بايقوڭىر قالاسىندا ق ر ەكولوگيالىق كودەكسى قولدانىلاتىن بولدى

بايقوڭىر. قازاقپارات - كەشە بايقوڭىر قالاسىندا «بايقوڭىر» كەشەنىن پايدالانۋ ماسەلەلەرى جونىندەگى قازاقستاندىق-رەسەيلىك ۇكىمەتارالىق كوميسسيانىڭ ەكىنشى وتىرىسى ءوتتى، دەپ حابارلادى قىزىلوردا وبلىسى اكىمدىگىنىڭ باسپا ءسوز قىزمەتىنەن.

كوميسسيا وتىرسىنا ق ر پرەمەر-ءمينيسترىنىڭ ءبىرىنشى ورىنباسارى باقىتجان ساعىنتايەۆ، ر ف ۇكىمەتى ءتوراعاسىنىڭ ورىنباسارى دميتري روگوزين جانە قىزىلوردا وبلىسىنىڭ اكىمى قىرىمبەك كوشەربايەۆ قاتىستى.

جيىندا اقاي جانە ءتوراتام كەنتتەرىن دامىتۋ جانە الەۋمەتتىك قولداۋ، بايقوڭىرلىق 6 مەكتەپتىڭ قازاقستاندىق ءبىلىم بەرۋ جانە مەديتسينالىق قىزمەت كورسەتۋ ستاندارتىنا كوشىرۋ ماسەلەلەرى قارالدى.

«بايقوڭىردىڭ 70 مىڭ تۇرعىندارىنىڭ 65 پايىزى - قازاقستاندىق ازاماتتار. بۇگىنگى كۇنگە دەيىن ءبىلىم بەرۋ جانە دەنساۋلىق ساقتاۋ سالاسىندا ءبىرقاتار شەشىلمەگەن ماسەلەلەر بولدى. بۇگىنگى كەزدەسۋ بارىسىندا وڭ شەشىمدەرگە قول جەتكىزدىك. ەڭ باستىسى - قالادا قازاقستان رەسپۋبليكاسىنىڭ ەكولوگيالىق كودەكسى قولدانىلاتىن بولدى. بىرلەسكەن جوبا ازىرلەندى، ول جەلتوقساندا ەكى ەلدىڭ پرەزيدەنتتەرىنىڭ كەزدەسۋى بارىسىندا تالقىلانادى»، - دەدى كەزدەسۋدە ب. ساعىنتايەۆ.

كەزدەسۋ بارىسىندا تاراپتار عارىش ايلاعىندا اپات تۋىنداعان جاعدايداعى ءوزارا ءىس-ارەكەت، جەر ۋچاسكەلەرىن پايدالانۋ ماسەلەلەرى، بايقوڭىر قالاسىنىڭ مارتەبەسى تۋرالى حالىقارالىق كەلىسىمگە قول قويۋ جايىندا ۋاعدالاستى.

بۇدان باسقا، بايقوڭىر مەن وعان جاقىن ورنالاسقان اۋماقتاردىڭ ەكولوگيالىق جاعدايىن جاقسارتۋ بويىنشا بىرلەسكەن جوبا ازىرلەندى. جوبانى ىسكە اسىرۋ جەلتوقساندا وتەتىن ەكى مەملەكەت باسشىلارىنىڭ كەزدەسۋىندە تالقىلاناتىن بولادى.