اقتوبەدە جارتى جىل بۇرىن جوعالىپ كەتكەن اسكەري كوميسسار ءتىرى كۇيىندە تابىلدى
بۇعان دەيىن وسى جىلدىڭ كوكتەمىندە 33 جاستاعى ارمان سۇراعانوۆتىڭ جۇمىس ۋاقىتىندا جوعالىپ كەتكەنى حابارلانعان ەدى.
جوعالىپ كەتكەن سەرجانت 23- قاراشادا حرومتاۋعا جاقىن جەردەن تابىلدى. سۇراعانوۆتىڭ تۋىستارىنىڭ ايتۋىنشا، سامارا - شىمكەنت تاس جولىندا ءىش كيىممەن كەتىپ بارا جاتقان ەر ادامدى شوپان تاۋىپ العان. قويشى پوليتسياعا كۇماندى ادام جايلى حابار بەرەدى. «ول قاتتى جۇدەپ كەتكەن، تىرناعى ءوسىپ، شاشى يىعىنا دەيىن جەتكەن، ونىڭ ءۇستى- باسى لاس بولدى، ال باستىسى ول ءتىرى»، - دەدى سەرجانتتىڭ تۋىسقانى ەركىن تالاسبايەۆ. ونىڭ پىكىرىنشە، اسكەري كوميسسارياتتىڭ قىزمەتكەرىن بىرەۋلەر وسى ۋاقىت بويى كۇشتەپ ۇستاپ كەلگەن.
قازىرگى ۋاقىتتا ارمان سۇراعانوۆ ۇيىنە جەتكىزىلدى، ول دەنساۋلىعى جاقسى ەكەنىن ايتتى. سەرجانتتىڭ تۋىسقاندارى ونىڭ دەنساۋلىعى جاقسى ءارى ءتىرى تابىلعانىنا وراي ساداقا بەرگەلى جاتىر. تۋىسقاندارى ونىڭ امان-ەسەن ورالاتىنىنا سەنبەپتى. پوليتسەيلەر قىلمىستىق ءىس تەرگەۋى مەن تابىلعان قىزمەتكەردىڭ مۇددەسىنە بايلانىستى پىكىر بىلدىرۋدەن باس تارتىپ، بولعان وقيعانىڭ جاي-جاپسارىن ايتپاي وتىر.
ەسكە سالا كەتەيىك، اسكەري كوميسسارياتتىڭ قىزمەتكەرى كەزەكشى پوستىنان 2014-جىلدىڭ 15- مامىرىندا بەلگىسىز سەبەپتەرمەن جوعالىپ كەتكەن بولاتىن. ونىڭ جوعالۋىنان كەيىن جۇمىس ورنى قارالىپ، وندا الدەكىمدەردىڭ توبەلەسكەن ىزدەرى تابىلدى. كابينەتتە توگىلگەن قان ءىزى تابىلىپ، زاتتار شاشىلعان.
