قازاقستان ايماقتاعى ەكونوميكالىق دامۋدىڭ ورتالىعى - چەحيا پرەزيدەنتى

استانا. قازاقپارات - قازاقستان ايماقتاعى ەكونوميكالىق دامۋدىڭ ورتالىعى. بۇل تۋرالى بۇگىن اقوردادا ەلباسى نۇرسۇلتان نازاربايەۆپەن وتكەن كەزدەسۋدەن كەيىنگى بىرلەسكەن مالىمدەمەدە چەحيا پرەزيدەنتى ميلوش زەمان ءمالىم ەتتى.

«جاقىندا چەحيا رەسپۋبليكاسىنىڭ ۇكىمەتى قابىلداعان شەشىمىندە قازاقستان باسىمدىقتى سەرىكتەس دەپ اتالدى. بۇل بارىنەن بۇرىن ستراتەگيالىق ۇزاقمەرزىمدى كوزقاراسىمىزدى قامتىپ وتىر. بۇرىندارى ەكونوميكاسى «كەرەمەت ەلدەر» سانالعان گەرمانيا، جاپونيا نەمەسە وڭتۇستىك كورەيا سەكىلدى مەملەكەتتەرمەن ءبىز ورتالىق ازيانى، اتاپ ايتقاندا قازاقستاندى سالىستىرا الامىز. سەبەبى، بۇگىندە قازاقستان ەكونوميكالىق عاجايىپتىڭ تارتىلىس ورتالىعىنا اينالدى»، - دەپ اتاپ ءوتتى ميلوش زامان.

وسى ورايدا چەحيا پرەزيدەنتى قازاقستاندا 12 جىل بۇرىن بولعاندىعىن ايتا كەلە، «ول كەزدە ەلىمىز ۇكىمەتىنىڭ ءتوراعاسى قىزمەتىندە ەدىم. سول ۋاقىتتى سالىستىرا كەلە، قازاقستاننىڭ وركەندەۋى مەن استانا قۇرىلىسىنداعى ەلەۋلى ىلگەرىلەۋشىلىكتى ايتقىم كەلەدى»، - دەدى.

بۇل تۇرعىدا ول قازاقستان قازىرگى دامۋ قارقىنى ناتيجەسىندە الەمدىك ەكونوميكادا ماڭىزدى ويىنشىلاردىڭ ءبىرى بولاتىنىنا سەنىمدى ەكەنىن اتاپ ءوتتى.

ايتا كەتەيىك، 2013-جىلى ەكى ەلدىڭ اراسىنداعى تاۋار اينالىمى 417,8 ميلليون ا ق ش دوللارىن قۇرادى، ال 2014-جىلدىڭ قاڭتار-قىركۇيەگىندە ونىڭ كولەمى 313,1 ميلليون دوللارعا جەتىپ، وتكەن جىلدىڭ سايكەس كەزەڭىنە قاراعاندا 6,7 پايىزعا ارتتى.

اۆتور: رۋسلان عابباسوۆ