الماتى وبلىسىندا مۇستافا وزتۇرىكتىڭ ەسكەرتكىشى اشىلدى
وعان تۇركيادان باتىردىڭ جان جارى مەن قىزدارى جانە باۋىرى ارنايى كەلىپ قاتىستى.
بۇل تۋرالى دۇنيە ءجۇزى قازاقتارى قاۋىمداستىعىنىڭ باسپا ءسوز قىزمەتى حابارلاپ وتىر.
اتاجۇرتىنا جۋساننىڭ ءيسىن اڭساپ جەتكەن بوزداقتار قانشاما؟! سونىڭ ءبىرى ءارى بىرەگەيى - مۇستافا وزتۇرىك ەدى.
اتتەڭ! عۇمىرى قىسقا بولدى. الاشتىڭ اردا تۋعان ۇلىن باتىراشتاردىڭ بالتاسى جەر قۇشتىردى. مۇستافانىڭ اتا-بابالارى وتكەن عاسىردىڭ 50 جىلدارى تار جول، تايعاق كەشۋدى باستان وتكىزىپ، قىتاي، پاكىستان، ءۇندىستان باعىتىمەن تۇرىك رەسپۋبليكسىنا ات باسىن تىرەپ ەدى. ءبىر اللاعا ايان، دەگەنمەن ەلى ءۇشىن تۋعان ەردىڭ ەڭ ۇلكەن باقىتى - قازاق ەلىنىڭ تاۋەلسىزدىگىنە كۋا بولعاندىعى شىعار.
مۇستافا ىستامبۇلداعى ورتا مەكتەپتى ءبىتىرىپ، تايۆانداعى ەكسپەريمەنتالدى ۋنيۆەرسيتەتتى جانە سول ەلدەگى حالىقارالىق قاتىناستار ۋنيۆەرسيتەتىنىڭ جۋرناليستيكا فاكۋلتەتىن قوسا بىتىرگەن. ول وسى ەلدە ءجۇرىپ، ۋنيۆەرسيتەت ديپلومىمەن بىرگە تاەكۆوندودان 6- دان سەرتيفيكاتىن الادى. بۇل تاەكۆوندودان بارشا مۇسىلمان الەمىندەگى العاشقى جوعارى دارەجە ەدى.
كەيىن گەرمانيانىڭ كەلن، ميۋنحەن جانە تۇركيانىڭ ىستامبۇل قالالارىندا ءوزىنىڭ تاەكۆوندو مەكتەبىن اشىپ، جاستاردى سپورتقا باۋلىدى. قازاقستان تاۋەلسىزدىك الا سالىسىمەن الماتىعا ورالعان ول تاەكۆوندوعا تاربيەلەۋ ورتالىعىن جاساقتاپ، قازاق ەلى تاريحىندا العاش رەت تاەكۆونديستەردى حالىقارالىق جارىستارعا اپارىپ، جەڭىسپەن ورالادى.
مۇستافا 1995 - جىلى بەلگىسىز جاعدايدا قازاعا ۇشىراپ، دەنەسى ىستامبۇل قالاسىندا جەرلەندى. 2000 - جىلى الماتى قالاسىندا مۇستافانىڭ اتىنا كوشە بەرىلىپ، ەسكەرتكىش بەلگى قويىلدى. 2004 - جىلى مارقۇمنىڭ 50 جاسقا تولعان مەرەيتويى قارساڭىندا الماتى وبلىسى تالعار اۋدانى بەساعاش اۋىلىندا ەسكەرتكىشى اشىلدى. بۇگىن وسى ەسكەرتكىش قايتا جاڭعىرتۋدان وتكىزىلىپ، كەزىندە جىبەرىلگەن ولقىلىقتاردىڭ ورنى تولتىرىلدى.
مۇستافا وزتۇرىك تاەكۆوندو سپورتىنان التى دۇركىن الەم چەمپيونى، حالىقارالىق جاتتىقتىرۋشى. التى ءتىل مەڭگەرگەن.
Baq.kz
