قازاقستاندىق جاس عالىم ماسكەۋدەن جەڭىسپەن ورالدى
«جاس عالىمدار جوباسىنىڭ كونكۋرسى 2007-جىلدان باستاپ وتكىزىلىپ ءجۇر. بۇل جوبانى جۇزەگە اسىرۋ د. ي. مەندەلەيەۆ اتىنداعى رەسەي حيميا قوعامىنىڭ پرەزيدەنتى، اكادەميك پاۆەل ساركيسوۆتىڭ يدەياسى بولىپ تابىلادى. ءبىرىنشى كونكۋرس «حيميا-2007» حيميا ونەركاسىبىنىڭ حالىقارالىق كورمەسى اياسىندا وتكىزىلدى. سودان بەرى ءار جىل سايىن قوعام رەسەيدىڭ جانە ت م د ەلدەرىنىڭ حيميا-تەحنولوگيالىق جانە تەحنيكالىق ينستيتۋتتارىنىڭ جاس عالىمدارىن جينايدى.
كونكۋرسقا حيميا، حيميالىق تەحنولوگيا، مۇناي حيمياسى، بيوتەحنولوگيا سالالارىنداعى جاستاردىڭ (عىلىمي دارەجەلەرى جوق، جاسى 30 عا دەيىنگى) جۇمىستارى قابىلدانادى. ءار ۇيىم 5 جوباعا دەيىن ۇسىنۋعا قۇقىلى. كونكۋرس جاريالانعاننان كەيىن ءار جاس عالىم ءوز جۇمىستارىن ساراپتاۋ كوميسسياسىنا جىبەرەدى. ەكسپەرتتىك كوميسسيا جوبالاردى الدىن الا قارايدى. فينالعا وتكەن جاس عالىمدار جۇمىستارىن بايانداما-تۇساۋكەسەر ارقىلى تانىستىرادى. باعالاۋ ولشەمدەرى: تاقىرىپتىڭ وزەكتىلىگى، جۇمىستىڭ زەرتتەلۋ دەڭگەيى، حيميالىق كاسىپورىن جانە كەشەندەر ءۇشىن پراكتيكالىق قىزىعۋشىلىعى، تانىستىرۋ ءراسىمى، تۇساۋكەسەردىڭ كوركەمدەلۋى، سۇراقتارعا جاۋاپ بەرۋى بولىپ تابىلادى.
كونكۋرستىڭ ۇيىمداستىرۋ كوميتەتىنە 24 ۇيىمنان، سونىڭ ىشىندە بەلارۋس مەملەكەتتىك تەحنولوگيالىق ۋنيۆەرسيتەتى، ۆولگوگراد مەملەكەتتىك تەحنولوگيالىق ۋنيۆەرسيتەتى، يۆانوۆ مەملەكەتتىك حيميالىق-تەحنولوگيالىق ۋنيۆەرسيتەتى، ءال-فارابي اتىنداعى قازاق ۇلتتىق ۋنيۆەرسيتەتى، ت. ب. ءبىرقاتار مەكەمەلەردەن جوبالار تۇسكەن.
ساراپتاما كوميسسياسى جوبالاردى الدىن الا قاراستىرىپ، جۇلدەگەرلەردى انىقتاعان. ولار 21 جاس عالىم ەكەن.
VIII جاس عالىمدار جوباسىنىڭ كونكۋرسى «حيميا-2007» حيميالىق ونەركاسىبىنىڭ جانە عىلىمنىڭ حالىقارالىق كورمەسى وسى جىلعى 23- قازاندا رەسەيدىڭ ماسكەۋ قالاسىندا وتكەن. ءاربىر قاتىسۋشى 10 مينۋتتىق بايانداما جاساپ، سودان كەيىن قويىلعان سۇراقتارعا جاۋاپ بەرگەن. قازىلار قاتىسۋشىلاردى 10 بالدىق ولشەممەن باعالاعان. م. اۋەلحان قىزى بارلىق قويىلعان سۇراقتارعا تولىق جاۋاپ بەرىپ، ءبىرىنشى ورىنعا يە بولدى»، - دەپ جازادى «ەگەمەن قازاقستان» گازەتى.
