شيەلىدە ميا تامىرىن وڭدەيتىن جانە اك شىعاراتىن زاۋىت اشىلدى
ميا تامىرىن وڭدەۋ زاۋىتىنىڭ جوبالىق قۇنى 612 ميلليون تەڭگەنى قۇرايدى. بۇل زاۋىت بارلىق ينفراقۇرىلىم تارتىلعان اۋداندىق يندۋستريالدى ايماقتا ورنالاسقان. جىلدىق قۋاتتىلىعى 250-300 توننا. مۇندا 50 ادام تۇراقتى جۇمىسقا ورنالاسقان.
ەلىمىزدىڭ يندۋستريالىق-يننوۆاتسيالىق باعدارلامالارىنىڭ قاتارىنا ەنگەن بۇل جوبالار ىشكى قاجەتتىلىكتى وتەپ، قالعانىن ەكسپورتقا شىعارادى. نەگىزگى ءونىم قىزىل ميا تامىرىنىڭ ەرىتىندىسى بولسا، ودان بولەك ءتۇرلى مەديتسينالىق ءدارى-دارمەككە قاجەتتى شيكىزات الىناتىن بولادى. قازىر قىزىل ميا تامىرىنا الەمدىك نارىقتا سۇرانىس ارتىپ تۇر. ولاردىڭ قاتارىندا گەرمانيا، ا ق ش، تۇركيا، جاپونيا دا بار. قىتايلىقتار دا قىزىل ميا تامىرىنا قىزىعۋشىلىق بىلدىرۋدە. جالپى، وبلىستا 80 مىڭ گەكتار القاپتا قىزىل ميا قورى بار. قىزىل ميا مەن ونىڭ تامىرىندا گليكوزيد، ساحاروزا، ەفير مايى، ورگانيكالىق قىشقىلدار، مينەرال تۇزدارى بار. وسى قاسيەتتەرىنە بايلانىستى ولار مەديتسينادا، تاماق جانە تەمەكى ونەركاسىبىندە قولدانىلادى. قىزىل ميانىڭ تامىرى بىرنەشە اۋرۋعا ەم، دەرتكە داۋا ەكەندىگى الدەقاشان دالەلدەنگەن. سوندىقتان بۇل كاسىپورىننىڭ بولاشاعى زور.
- ءوڭىردىڭ دامۋىنا ءوز ۇلەسىن قوسىپ كەلە جاتقان كاسىپكەرلەرىمىزدىڭ ەڭبەكتەرى اۋداننىڭ قۇلاش جايىپ كوركەيۋىنە، كەنتتىڭ كەلبەتىنىڭ شىرايلانۋىنا نەگىز بولۋدا. بۇل ەكى نىسان دا يندۋستريالدى جوبا. ءوندىرىستى وركەندەتۋگە مۇمكىندىك بەرەدى. بۇل بىرىنشىدەن ەلباسى تاپسىرعان، جەرگىلىكتى حالىققا تۇراقتى جۇمىس ورنىمەن قامتۋ بولىپ تابىلادى. وعان قوسا، بيۋجەتكە تۇسەتىن قوماقتى قاراجات، سوسىن ەل ەكونوميكاسىنىڭ دامۋىنا ۇلكەن ۇلەس بولادى، - دەدى وبلىس اكىمى ق. كوشەربايەۆ.
ال، سالتاناتتى تۇردە اشىلعان ەكىنشى نىسان «شيەلى تاس - وڭتۇستىك» ج ش س-ءنىڭ جوبالىق قۇنى 777 ميلليون تەڭگە. كاسىپورىندى ينفراقۇرىلىممەن قامتاماسىز ەتۋ ماقساتىندا «بيزنەستىڭ جول كارتاسى 2020» باعدارلاماسى اياسىندا رەسپۋبليكالىق بيۋدجەتتەن 54 ميلليون تەڭگە قارجى ءبولىنىپ، ەلەكتر جەلىسى جۇرگىزىلدى. جىلدىق قۋاتتىلىعى 60 مىڭ توننالىق جاڭا جوبا بويىنشا 84 ادام تۇراقتى جۇمىسپەن قامتىلدى. الداعى ۋاقىتتا بۇل كاسىپورىندا سيليكات كىرپىش وندىرىلەتىن بولادى.
اۆتور: ەلۋباي اۋەزوۆ
