الماتىداعى جارىلىسقا بايلانىستى تاعى ءبىر ادام قاماۋعا الىندى

الماتى. قازاقپارات - الماتىدا ءسان جانە ديزاين كوللەجىندەگى جارىلىسقا بايلانىستى وسى كوللەجدىڭ العاشقى اسكەري دايىندىق ءپانىنىڭ بۇرىنعى ءمۇعالىمى يۋري گاۆريلەنكو قاماۋعا الىندى. بۇل تۋرالى بۇگىن الماتى قالالىق سوتى باسپا ءسوز قىزمەتىنىڭ جەتەكشىسى قۋاندىق ەشمەت مالىمدەدى.

«الماتى قالاسىنىڭ المالى اۋداندىق سوتى الماتى ءسان جانە ديزاين كوللەدجىندە بۇرىن العاشقى اسكەري دايارلىق ءپانىنىڭ ءمۇعالىمى بولىپ ىستەگەن يۋري گاۆريلەنكونى ەكى اي مەرزىمگە قاماۋعا الدى. وعان ق ر قىلمىستىق كودەكسىنىڭ 251-بابىنىڭ 1- تارماعىنا سايكەس («اتىس قارۋىن (تەگىس ۇڭعىلى اڭشى مىلتىعىنان باسقا)، وق-دارىلەردى، جارىلعىش زاتتاردى نەمەسە جارىلعىش قۇرىلعىلاردى زاڭسىز ساتىپ الۋ، بىرەۋگە بەرۋ، وتكىزۋ، ساقتاۋ، تاسىمالداۋ نەمەسە الىپ ءجۇرۋ») ايىپ تاعىلدى. قاماۋعا الۋ مەرزىمى 2014-جىلدىڭ 19- قاراشاسى كۇنى، كەشكى ساعات 19:00-دەن باستالدى. ايىپتالۋشىنىڭ وسى مەرزىمنەن باستاپ، ءۇش كۇن ىشىندە شاعىم تۇسىرۋىنە بولادى»، - دەدى ق. ەشمەت.

سونداي-اق، الماتى قالالىق سوتى باسپا ءسوز قىزمەتى جەتەكشىسىنىڭ ايتۋىنشا، يۋري گاۆريلەنكو 2010-جىلى ر گ د-5 جارىلعىش اسكەري گراناتاسىن ساتىپ الىپ، ونى ءوزىنىڭ ساباق وتكىزەتىن بولمەسىندە ساقتاعان. ءمۇعالىمنىڭ گراناتانى قايدان جانە قانداي ماقساتقا العاندىعى ازىرگە بەلگىسىز.

ايتا كەتەلىك، ۇستىمىزدەگى جىلى 17- قاراشا كۇنى تاڭعى ساعات 08:40 تا الماتى ءسان جانە ديزاين كوللەجىنىڭ ەكىنشى قاباتىندا گراناتا جارىلىسى ورىن العان بولاتىن. ناتيجەسىندە العان جاراقاتتان وقيعا ورنىندا ءبىر ستۋدەنت قىز كوز جۇمىپ، تاعى 12 ستۋدەنت ءار ءتۇرلى جاراقاتتارمەن اۋرۋحاناعا جەتكىزىلدى. سونىمەن قاتار، تاعى ءۇش ادام دارىگەرلەردىڭ كومەگىنە وزدەرى جۇگىنگەن. وقيعاعا بايلانىستى قىلمىستىق ءىس قوزعالدى.

ال 20- قاراشا كۇنى العاشقى اسكەري دايارلىق ءپانىنىڭ ءمۇعالىمى عابيت قارابالايەۆ ەكى ايعا قاماۋعا الىندى. جارىلىس سول ءمۇعالىمنىڭ ساباعىندا ورىن العان بولاتىن. ول كوللەجگە 2013-جىلدىڭ قىركۇيەك ايىندا جۇمىسقا قابىلدانعان ەكەن.

اۆتور: جاپپاربەرگەن ايبوتا