جانار دۇعالوۆا ءان ايتىپ جاتقاندا مەن قازاقستان ءۇشىن قاتتى قۋانىپ وتىردىم - بايان ەسەنتايەۆا

استانا. قازاقپارات - جانار دۇعالوۆا ءان ايتىپ جاتقاندا مەن قازاقستان ءۇشىن قاتتى قۋاندىم.

بۇل تۋرالى كەشە ورتالىق كوممۋنيكاتسيالار قىزمەتىندە ءانشى جانار دۇعالوۆانىڭ «Turkvizyon-2014»  حالىقارالىق ءان بايقاۋىندا جەڭىسكە جەتۋىنە وراي ۇيىمداستىرىلعان بريفينگتە بەلگىلى قازاقستاندىق پروديۋسەر بايان ەسەنتايەۆا ايتتى.

 «ءبىز بارلىق جاۋاپكەرشىلىكتى اۋەل باستان بارىنشا تۇسىندىك، سوندىقتان كونكۋرسقا جاقسىلاپ دايىندالىپ، تەك قانا جەڭىستى ماقسات ەتتىك. جانار ءان ايتىپ جاتقان كەزدە مەن قازاقستان ءۇشىن كەرەمەت قۋانىشتا بولدىم. جانار دەر كەزىندە ءوزىن- ءوزى سابىرعا كەلتىرىپ، ءانىن شىرقاپ، دەگەنىنە جەتتى»، - دەدى بايان ەسەنتايەۆا.

ايتا كەتەيىك، فينالدا ءۇشىنشى بولىپ ونەر كورسەتكەن جانار دۇعالوۆا 225 ۇپاي جينادى. ول بايقاۋدا رينات زايىتوۆتىڭ سوزىنە جازىلعان ءتول تۋىندىسى «ءىزىن كورەم» ءانىن ورىندادى.

جانار جارتىلاي فينالدان سوڭ ءۇشىنشى ورىندا تۇرعان بولاتىن. ول اقتىق سايىستا ەكىنشى ورىنداعى تاتارستان انشىسىنەن 24  ۇپاي ارتىق جينادى.

«تۇركى الەمىندە وسىنداي كونكۋرستىڭ پايدا بولۋىنا وتە قۋانىشتىمىز. ول تۇركى تىلدەس ەلدەردى بىرىكتىرۋگە اسا قاجەت. ءبىز كونكۋرسقا وتە سالماقتى تۋىندى اپارۋ كەرەك ەكەنىن جاقسى بىلدىك، سوندىقتان دايىندىق جۇمىستارىنا وتە كوپ كاسىبي ماماندار تارتىلدى»، - دەپ اتاپ ءوتتى ول.

 اۆتور: ءابۋ- اسقار مەكەش ۇلى