ەلباسى جولداۋىن اسكەري قىزمەتشىلەر دە قولدايدى - فوتو
ورال. قازاقپارات - بۇگىن ق ر ۇلتتىق ۇلانى «باتىس» وڭىرلىك قولباسشىلىعىنا قاراستى 5517-اسكەري ءبولىمىنىڭ كلۋبىندا اسكەري قىزمەتشىلەر ەلباسى جولداۋىن تالقىلاپ، ءبىراۋىزدان قولدايتىندىقتارىن ءبىلدىردى.
«باتىس» وڭىرلىك قولباسشىلىعىنىڭ باسپا ءسوز قىزمەتىنەن تۇسكەن مالىمەتكە قاراعاندا، جيىندا ورال گارنيزونىنىڭ اسكەري پروكۋرورى، ادىلەت پودپولكوۆنيگى التىنباي رايەۆ ەلباسىنىڭ «نۇرلى جول - بولاشاققا باستار جول» اتتى جولداۋىنىڭ نەگىزگى باعىتتارىن ءتۇسىندىرىپ بەردى. «ەلباسى جولداۋىن جىل سايىن قازاقستاندىقتار اسىعا كۇتەدى. وندا ەلدىڭ ەكونوميكالىق-الەۋمەتتىك دامۋىنىڭ بارلىق باعىتتارى ناقتىلانادى. سونىڭ ىشىندە قوعامداعى وزگەرىستەر، جاڭا باستامالار قازاقستان قارۋلى كۇشتەرىن دە اينالىپ وتپەيدى»، دەدى ا. رايەۆ.
بۇدان كەيىن «باتىس» وڭىرلىك قولباسشىسىنىڭ تاربيە جانە الەۋمەتتىك-قۇقىقتىق جۇمىستار جونىندەگى ورىنباسارى، پولكوۆنيك بەرىك وماروۆ ەل دامۋى ءۇشىن بارلىق جاعداي جاسالىپ وتىرعانىن، اسكەردىڭ بەيبىتشىلىك پەن قاۋىپسىزدىك كەپىلى بولىپ قالا بەرەتىنىن اتاپ ءوتىپ، ەلباسى جولداۋىنا سايكەس الدا تۇرعان ماقسات-مىندەتتەرگە توقتالدى. سونداي-اق ب ق و قورعانىس ىستەرى جونىندەگى دەپارتامەنت باستىعىنىڭ ورىنباسارى، پودپولكوۆنيك مارات ەسەنوۆ، ق ر ۇ ق ك شەكارا قىزمەتى 2029-اسكەري ءبولىمىنىڭ اعا وفيتسەرى، مايور گلەب رىبالكين، 5517-اسكەري ءبولىمىنىڭ كومانديرى، پودپولكوۆنيك ايان ەسجانوۆ ەل ومىرىندەگى اسا ماڭىزدى قۇجاتتى بارلىق اسكەري قىزمەتشىلەر باسشىلىققا الۋى قاجەتتىگىن جەتكىزدى.
