قازاقستاننىڭ ۇيالى بايلانىس بولىمشەلەرىندە دۇرلىگۋ بولىپ جاتىر
Tengrinews.kz ءتىلشىسى ۇيالى بايلانىس وپەراتورلارىنىڭ قىزمەت كورسەتۋ ورتالىقتارىنىڭ ءبىرقاتارىنا بارىپ كوردى.
بارلىق جەردە نومىرلەر قايتا تىركەۋدەن ءوتىپ جاتىر.
كەزەكتە تۇرعان ادامداردىڭ ايتۋىنشا، كۇتىپ تۇرعان ءبىر ەر ادام تالىپ قالعان، ونى جەدەل جاردەم اكەتىپتى.
ۇيالى بايلانىس وپەراتورلارى بولىمشەلەردى ادام كوپ جينالىپ قالماۋى ءۇشىن نومىرلەردى ونلاين- رەجيمدە نەمەسە بالامالى بايلانىس كەڭسەلەرىندە تىركەۋگە كەڭەس بەرىپ جاتىر.
"كوپ ادام كەلەدى، قىزمەت كورسەتۋ ورتالىقتارىنا حالىق ءۇيىلىپ قالىپ جاتقان جاعداي بايقالىپ جاتىر. تىركەۋدە جوق نومىرلەردى وشىرەتىنى تۋرالى اقپارات ءبارىن ءدۇر سىلكىندىردى، - دەدى Beeline باسپا ءسوز قىزمەتىنىڭ جەتەكشىسى الەكسەي بەندز.
- ادامدار كەزەكتە تۇرعاندا جۇيكەسى توزىپ، سودان كەلەڭسىزدىك تۋادى (...) ءبىراق بىزدە ونىڭ ورنىنا باسقا ۇسىنىس بار. باستاپقىدا ءبىزدىڭ سايتتاعى جەكە كابينەتتەن ءنومىردىڭ كىمگە تىركەلگەنىن تەكسەرۋ كەرەك، سىزگە تىركەلمەسە "ازبۋكا سۆيازي" سالونىنا جەكە كۋالىگىڭىزبەن بىرگە كەلۋىڭىز كەرەك، ونداي سالوندار ەلىمىز بويىنشا 100 دەن اسادى. ابونەنتتەردىڭ جالپى ەسەبىندە تىركەلمەگەن نومىرلەردىڭ سانى وتە از، - دەدى سپيكەر. ول تىركەلمەگەن نومىرلەر 1 - جەلتوقساندا وشىرىلەتىن بولسا دا كومپانيا ايتارلىقتاي جاپا شەكپەيتىنىن ايتتى. بەندز، سونىمەن قاتار، نومىرلەردى بۇل كۇننەن كەيىن دە قايتا تىركەۋگە بولاتىنىن ايتتى.
Kcell كومپانياسىنىڭ وكىلدەرى ابونەنتتەردى تىركەۋ پروتسەسى بەلسەندى تۇردە ءجۇرىپ جاتقانىن ايتتى. ء"بىزدىڭ قىزمەت كورسەتۋ ورتالىقتارىمىزعا كەلەتىن ادامنىڭ سانى كۇن وتكەن سايىن كوبەيىپ كەلەدى"، - دەدى باسپا ءسوز قىزمەتىنىڭ وكىلدەرى. ءبىراق كومپانيا "جابىق مالىمەت" ەكەنىن ايتىپ، تىركەلمەگەن نومىرلەردىڭ سانىن جاسىرىن قالدىردى.
Tele2 وكىلدەرى بولسا ابونەنتتەرىن الاڭداماۋعا شاقىردى. ولار ابونەنتتەرىنە سايتتاعى ءوز جەكە كابينەتىنە كىرىپ، دۇرىستاپ تەكسەرۋگە كەڭەس بەردى. "تىركەۋ دۇرىس جاسالدى ما، جوق پا - وسى ماسەلە تۋىنداۋى مۇمكىن، سەبەبى بىزدە ساتىلىمدار ديلەرلەر ارقىلى ءجۇردى. سونىمەن بىرگە بىزگە ءنومىردى قايتارا تىركەۋ كەرەك پە دەگەن سۇراق قويادى.
ءبىز "جوق، ولاي جاساماي-اق قويساڭىزدار بولادى" دەپ جاۋاپ بەرەمىز، - دەيدى Tele2 باسپا ءسوز قىزمەتىنىڭ جەتەكشىسى ەلەنا مۋحسينوۆا. - ءنومىردى ونلاين تۇردە نەمەسە قىزمەت كورسەتۋ ورتالىعىنا قۇجاتپەن كەلىپ تىركەلۋ كەرەك.
سوڭعى ءتورت كۇندە قايتا تىركەۋگە وتىنىشتەر 10 ەسە كوبەيدى. اجيوتاج بار، قوسىمشا قىزمەت كورسەتۋ ورتالىقتارىن اشۋ تۋرالى ويلانىپ وتىرمىز"، - دەدى ول.
وسىعان دەيىن 1 - جەلتوقساندا قازاقستاندا تىركەلمەگەن بارلىق نومىرلەردىڭ وشىرىلەتىنى حابارلانعان بولاتىن. ال دۇرىس ەمەس مالىمەت بەرگەندەرگە ايىپپۇل سالىناتىن بولعان. ال شەتەلدىكتەرگە كەلسەك، ولاردى قازاقستاندىق ۇيالى بايلانىس نومىرلەرىن ساتىپ الۋدا شەكتەمەيتىن بولدى. ءبىراق ولار دا ءنومىردى ساتىپ الۋ كەزىندە جەكە مالىمەتتەرىن وتكىزۋى كەرەك بولادى.
بيلىك بۇل شارالاردىڭ قاۋىپسىزدىكتى ساقتاۋ ماقساتىندا جاسالىپ جاتقانىن ايتتى. ەندى قازاقستاندىق ءار تۇرعىن ءوزىنىڭ دەربەس ىسىنە جاۋاپكەرشىلىك الاتىن بولدى. ۇيالى بايلانىس وپەراتورلارى ءوز كەزەگىندە بۇل شارانى مىندەتتى ءارى ءوز كەزىندە جاسالىپ وتىر دەپ ەسەپتەيدى.
tengrinews.kz
