قازاقستان مەن شۆەيساريانىڭ بيىلعى ەكونوميكالىق قارىم- قاتىناسى وتە جاقسى - ن. نازاربايەۆ

استانا. قازاقپارات - شۆەيساريا مەن قازاقستاننىڭ اراسىندا تىعىز ەكونوميكالىق، ساياسي قارىم- قاتىناستار ءجۇرىپ جاتىر.

 بۇل تۋرالى بۇگىن اقوردادا شۆەيتساريانىڭ پرەزيدەنتى ديدە بۋركحالتەرمەن كەلىسسوزدەردەن كەيىنگى بىرلەسكەن مالىمدەمەدە ەلباسى نۇرسۇلتان نازاربايەۆ ءمالىم ەتتى.

«شۆەيساريا ەۋرپاداعى ءبىزدىڭ ءتورتىنشى ورىنداعى ەكونوميكالىق ساۋدا ارىپتەسىمىز بولىپ تابىلادى. وسى جىلدار ىشىندە بۇل ەلدەن 12 ميلليارد دوللارعا جۋىق ينۆەستيتسيا قازاقستانعا قۇيىلدى. ەكى ەلدىڭ اراسىنداعى تاۋار اينالىمى 4,5 ميلليارد دوللارعا (2013 - جىلى) جەتتى. قازىرگى قيىنشىلىق داعدارىس جاعدايىنا قاراماي، بيىلعى جىلدىڭ وزىندە ەكونوميكالىق قارىم- قاتىناس وتە جاقسى»، - دەدى پرەزيدەنت.

ەلباسى اتالعان ەلمەن كوپتەگەن سالالاردا ىنتىماقتاستىقتا ءتيىستى جۇمىستار اتقارىلىپ جاتقاندىعىن اتاپ ءوتتى.

«ءبىزدىڭ تاۋەلسىزدىك العان كۇننەن باستاپ شۆەيساريا كونفەدەراتسياسى مەن قازاقستاننىڭ اراسىندا تىعىز ەكونوميكالىق، ساياسي قارىم- قاتىناستار ءجۇرىپ جاتقانىن بىلەسىزدەر»، - دەدى پرەزيدەنت.

ايتا كەتەيىك، 2013 - جىلى قازاقستان مەن شۆەيتساريانىڭ تاۋار اينالىمى 4,45 ميلليارد دوللاردى قۇرادى. وندا ەكسپورت - 4,26 ميلليارد دوللاردى، ال يمپورت - 189,5 ميلليون دوللاردى قامتىدى. بيىلعى قاڭتار- تامىزدا تاۋار اينالىمى 3,27 ميلليارد دوللارعا جەتىپ، بىلتىرعى وسى كەزەڭمەن سالىستىرعاندا 5,8 پايىزعا ارتتى.

 

ق ر پرەزيدەنتى حالىقارالىق ساياساتتا بولىپ جاتقان وقيعالارعا ەكى ەل بىردەي كوزقاراستى ۇستانىپ وتىرعانىن ايتا كەلە، «قوس تاراپ تا ۋكراينالىق داعدارىس پروبلەماسىن جىلدامداتىپ شەشۋ نيەتىن ءبىلدىرىپ وتىر. ءبىز بۇل ەلدە بەيبىتشىلىك ورناپ، ءال- اۋقاتىنىڭ تۇراقتانۋىنا مۇددەلىمىز»، - دەدى ەلباسى.

اۆتور: رۋسلان عابباسوۆ