داعدارىستى احۋال جاعدايىندا قازاقستان ساقتىق شارالارىن قابىلدايدى - ن. نازاربايەۆ
بۇل تۋرالى اقوردانىڭ باسپا ءسوز قىزمەتىنەن حابارلادى.
جيىنعا سونداي-اق پرەمەر- مينيستر ك. ءماسىموۆ، پرەزيدەنتتىڭ كومەكشىسى ە. ورىنبايەۆ، ينۆەستيتسيا جانە دامۋ ءمينيسترى ءا. يسەكەشيەۆ، «بايتەرەك» ۇ ب ح» ا ق باسقارما ءتوراعاسى ق. بيشىمبايەۆ، «قازاقستاننىڭ يندۋستريانى دامىتۋ ينستيتۋتى» ا ق باسقارما ا. كۇلسەيىتوۆ جانە ءبىرقاتار حالىقارالىق ساراپشىلار قاتىستى.
قازاقستان پرەزيدەنتى الەمدىك نارىق جۇيەسىندەگى قيىندىقتارعا نازار اۋداردى، سوعان بايلانىستى وتاندىق ەكونوميكانى دامىتۋ امالدارىن دا قايتا قاراعان ءجون ەكەندىگىن ايتتى.
«ءبىز قازاقستاندى يندۋستريالاندىرۋدىڭ ءبىرىنشى كەزەڭىن اياقتادىق. ونىڭ بارىسىندا پايدالى تاجىريبە جيناقتالدى، كاسىپورىندار سالىنىپ، جاڭا جۇمىس ورىندارى اشىلدى. بۇل رەتتە بەلگىلى ءبىر تابىستارعا جەتتىك دەپ سانايمىن. قازىر باعدارلاما قايتا قارالدى، كەلەسى جىلدان باستالاتىن ەكىنشى بەسجىلدىق يننوۆاتسياعا ورايلاستىرىلاتىن بولادى»، - دەدى مەملەكەت باسشىسى.
نۇرسۇلتان نازاربايەۆ رەسەي مەن باتىس ەلدەرى اراسىنداعى تەكەتىرەسكە بايلانىستى داعدارىستى احۋال جاعدايىندا قازاقستان ساقتىق شارالارىن قابىلداۋعا شەشىم قابىلداعانىن اتاپ ءوتتى.
«مەنىڭ جاڭا جولداۋىمدا ەكونوميكا ءوسىمىن قامتاماسىز ەتۋگە، جۇمىس ورىندارىن قۇرۋعا قوماقتى مەملەكەتتىك قاراجات سالۋ جايى قاراستىرىلعان. بۇل سونداي-اق ەلدىڭ قارجىلىق جۇيەسىن نىعايتۋعا مۇمكىندىك بەرىپ، شاعىن جانە ورتا بيزنەستىڭ ءارى قاراي دامۋىنا سەپتىگىن تيگىزەدى. وسى باعىتتاردىڭ بارلىعى بويىنشا ءىس-قيمىل باعدارلامالارىن بەلگىلەپ، قارجى رەسۋرستارىن بولدىك. بۇل قادامدارىمىزدى بىزبەن ءوزارا ءىس-قيمىل تۋرالى ۋاعدالاستىققا قول جەتكىزگەن الەمدىك قارجى ينستيتۋتتارى قولداپ وتىر. سالىستىرمالى تۇردە حالقىنىڭ سانى از قازاقستان ءۇشىن ەكونوميكاعا ءبىر مەزگىلدە 20 ميللياردتان استام دوللار سالۋ ايتارلىقتاي ناتيجە بەرۋى ءتيىس»، - دەدى قازاقستان پرەزيدەنتى.
مەملەكەت باسشىسى سىرتقى ەكونوميكالىق جاعدايلاردىڭ دا وزگەرگەندىگىنە، وتاندىق بيزنەسكە سونىڭ اياسىندا جۇمىس ىستەۋگە تۋرا كەلەتىنىنە توقتالدى.
«قازاقستان ەۋروپالىق وداقپەن كەڭەيتىلگەن سەرىكتەستىك جانە ىنتىماقتاستىق تۋرالى كەلىسىمنىڭ جوباسى بويىنشا كەلىسسوزدەردى اياقتادى. ءبىز دۇنيەجۇزىلىك ساۋدا ۇيىمىنا كىرۋدىڭ سوڭعى ساتىسىندا تۇرمىز. كەلەسى جىلدان باستاپ قازاقستان، رەسەي جانە بەلارۋستىڭ ەكونوميكالىق وداعى جۇمىسىن باستايدى.
ءبىزدىڭ ماقساتىمىز تەك قانا پراگماتيكالىق بولىپ سانالادى، ويتكەنى رەسەي - 7,5 شاقىرىم ورتاق شەكارامىز بار ەڭ باستى سەرىكتەسىمىز. قازاقستان قۇرلىقتىڭ ورتاسىندا ورنالاسقاندىقتان، تەڭىزگە شىعاتىن جولى جوق. سول سەبەپتى دە كەدەندىك كەدەرگىلەردى جوياتىن، جۇكتەرىمىزدى سىرتقى نارىقتارعا بوگەتسىز شىعاراتىن كەدەن وداعى ءبىز ءۇشىن ماڭىزدى مانگە يە»، - دەدى نۇرسۇلتان نازاربايەۆ.
حالىقارالىق ساراپشىلار جاھاندىق ەكونوميكاداعى سوڭعى ۇردىستەر، دامىعان جانە دامۋشى ەلدەر ساياساتىنداعى جاڭا ترەندتەر جونىندەگى پىكىرلەرىن ورتاعا سالدى، سونداي-اق قازاقستاندى يندۋستريالاندىرۋدىڭ ءبىرىنشى كەزەڭىنىڭ قورىتىندىلارى مەن كەلەسى كەزەڭىنىڭ پەرسپەكتيۆالارىن بايىپتادى.
ولار قازاقستاننىڭ حالىقارالىق ەكونوميكاداعى سىن-قاتەرلەرگە ساي دۇرىس جولدار تابا الاتىنىنا سەنىم ءبىلدىردى، ويتكەنى ءبىزدىڭ ەلدە قاجەتتى تاجىريبە جانە ادام رەسۋرسى بار. سونىمەن قاتار، جۇرگىزىلىپ جاتقان يندۋستريالاندىرۋدى ەسكەرسەك، رەسپۋبليكامىزدىڭ قىتاي مەن رەسەي سەكىلدى الىپ نارىقتار ورتاسىندا ورنالاسۋى كەلەشەكتەگى دامۋ ءۇشىن زور مۇمكىندىكتەر اشادى.
