ءۇندى توپىراعىندا «قۇداي-ۇل» ءومىر ەسىگىن اشتى

استانا. قازاقپارات - ءۇندىستاننىڭ بارۋيپۋر قالاسىندا وتكەن اپتادان بەرى حالىق ابىر-سابىر بولىپ جاتىر.

ويتكەنى ءتورت اياق-قولى بار ۇل دۇنيەگە كەلگەن.

جەرگىلىكتى تۇرعىندار «بۇل جوعارىدان جەر بەتىنە قۇدايدىڭ جىبەرگەن ەلشىسى» دەپ جاتىر.

جالپى، ءۇندىستان حالقىنىڭ تابىناتىن قۇدايى كوپ. سونىڭ ءبىرى - ءتورت اياعى مەن قولى، بىرنەشە باسى بار قۇبىلىس. تۇرعىندار سوعان تابىنادى.

ال دۇنيە ەسىگىن اشقان ۇلدى دا ۇلكەن قۇبىلىستىڭ ءبىرى دەپ وتىر. ءتىپتى بالانىڭ جامباس تۇسىندا مىسىقتىكى تارىزدەس قوسىمشا قۇيرىقتا بار كورىنەدى. ءۇندى تەلەارناسىنىڭ بارلىعى دا قازىر عاجايىپ بالا تۋرالى تامسانا ايتىپ جاتىر.

- قوسىمشا اياق قولى مەن قۇيرىعى بار قۇداي بەرگەن ۇل ءبىزدىڭ ولكەدە بەكەر دۇنيەگە كەلگەن جوق. ءبىزدىڭ جەرگە جاراتقاننىڭ كوزى ءتۇسىپ تۇر. ول دۇنيەگە كەلگەندە، سەنبەپ ەدىك، ەندى ءبارى راسقا اينالدى. بۇل تاڭعاجايىپ قۇبىلىس، قۇداي بەرگەن ۇل، - دەپ جاتىر جۇرت.

ءتىپتى وسى وقيعادان كەيىن سول ولكەدەگى جاعداي كۇردەلەنىپ كەتكەنگە ۇقسايدى. مىڭداعان ادام بالا ومىرگە كەلگەن پەرزەنتحاناعا ۇمتىلىپ، بالانى كورۋگە اسىققان. اۋرۋحانانىڭ ەسىگىن تاپتاپ كەتە جازداعان. ادامداردىڭ كەيبىرەۋى جىلاپ، ەكىنشىلەرى «ءبىزدىڭ جەرگە قۇدايدىڭ پەرىشتەسى كەلىپ ءتۇستى» دەپ جاراتقانعا جالبارىنىپ جاتقان كورىنەدى.

ءتىپتى حالىقتىڭ ءبىرسىپىراسى «بۇل اقىرزاماننىڭ بەلگىسى» دەپ بالانى قۇرتۋعا كەڭەس بەرىپ، ات- توندارىن الا قاشىپتى. وسىعان قاراپ-اق جۇرتتىڭ الاڭدايتىنداي ءجونى بار ەكەنىن بايقاۋعا بولادى.

ءبىراق «قورىققانعا قوس كورىنەدى» ەمەس پە؟ دەگەنمەن، حالىقتىڭ الاڭدايتىنداي ءجونى بار. بۇل ءۇندى توپىراعىندا قۇبىلىس ەمەس، قۇبىجىق رەتىندە دۇنيەگە كەلىپ وتىرعان العاشقى سابيلەردىڭ ءبىرى. وسىدان ءبىراز ۋاقىت بۇرىن، 2007 - جىلى ءۇندىستاننىڭ بانگالور قالاشىعىندا دا قىز بالا دۇنيەگە كەلگەن. ونىڭ ەسىمىن ءتورتقولدى تابىس پەن ساتتىلىك قۇدايىنىڭ قۇرمەتىنە وراي لاكشمي دەپ قويعانى بەلگىلى.

ەندى مىنە، ءۇندى توپىراعىندا «قۇداي-ۇل» ءومىر ەسىگىن اشتى. ءبىراق ول شىن مانىندە جاراتقاننىڭ جەرگە جىبەرگەن ەلشىسى مە؟ دارىگەرلەردىڭ ايتۋىنا قاراعاندا، بۇل شالا تۋعان ەگىزدىڭ جارتىسى كورىنەدى. الداعى ۋاقىتتا سابيگە بىلىكتى ماماندار وپەراتسيا جاساماق.

ال جەرگىلىكتى حالىق «قۇداي-ۇلدى» كورۋگە جينالىپ، قاپتاپ كەتكەن سوڭ، پوليتسيا قاۋىپسىزدىك شارالارىن ۇيىمداستىرعان. حالىق قاراڭعى بولسا، نەنى جانە كىمدى بولسا دا، قۇداي كورە بەرەدى ەكەن عوي.

دايىنداعان بەرىك بەيسەن ۇلى

«ايقىن»