كوممۋنيستەر استانادا قاجىمۇقانعا ەسكەرتكىش ورناتۋدى ۇسىنادى
بۇگىن ماجىلىستە ۇكىمەت باسشىسىنىڭ اتىنا ساۋال جولداعان «حالىقتىق كوممۋنيستەر» پارتياسى فراكسياسىنىڭ مۇشەسى تولەش كەنجەن وسى ماسەلەنى كوتەردى.
ساۋال بارىسىندا دەپۋتات جاقىندا ەكرانعا شىققان رەسەيلىك «پوددۋبنىي» فيلمى ءبىرقاتار ت م د ەلدەرىنە، سونىڭ ىشىندە قازاقستاندا ءار ءتۇرلى پىكىرلەر تۋعىزعانىن اتاپ ءوتتى.
«مەن بۇل سالانىڭ بىلگىر مامانى ەمەسپىن. ماماندار بارلىق ماسەلەنىڭ ءمان-جايىن انىقتاپ جاتار. ال ءبىزدىڭ ساۋالىمىز اتاقتى بالۋان جانە قازاق حالقىنىڭ باتىر ۇلى - قاجىمۇقان مۇڭايتپاس ۇلىنىڭ ەسىمىن ماڭگى ەستە قالدىرۋعا بايلانىستى بولىپ وتىر.
ۇلت باتىرى جەرلەنگەن وڭتۇستىك قازاقستانداعى سپورتتى قادىرلەيتىن ازاماتتاردىڭ بالۋاننىڭ مۇراجايىن اشۋى ماقتاۋعا تۇرارلىق ءىس. ال وسى قاراشا ايىندا تالاپكەر اۋىلدىق وكرۋگىنىڭ جۇرتشىلىعى ءوزى تۋىپ وسكەن اۋىلدا ۇلى تۇلعانىڭ ەسكەرتكىشىن ورناتتى. تالاپكەر - استانا توڭىرەگىندەگى ەلدى مەكەن. بۇل دا اتاپ وتۋگە تاتيتىن جايت. الايدا، ۇلت ماقتانىشىنا اينالعان قاجىمۇقاننىڭ ەسكەرتكىشى استانادا نەگە جوق؟» - دەدى ت. كەنجين.
ونىڭ ايتۋىنشا، اتالعان شارا قازاق حاندىعىنىڭ 550 جىلدىعى قارساڭىندا، جەڭىستىڭ 70 جىلدىعى قارساڭىندا ماڭىزدى ماسەلە ەكەنى ءسوزسىز. ويتكەنى، ۇلت باتىرى ۇلى وتان سوعىسى جىلدارىندا ءوز قاراجاتىنا ۇشاق جاساتقانى تاريحتان بەلگىلى.
اۆتور: قانات مامەتقازى ۇلى
