استانادا تۇڭعىش قازاقستاندىق «ايتىس» اتتى لەزدىك حابار الماسۋ باعدارلاماسى تانىستىرىلدى
مەملەكەتتىك ءتىلدى دامىتۋ قورىنىڭ ديرەكتورى ازات شاۋەيەۆ پەن جوبا جەتەكشىسى ءداۋىت شايحيسلاموۆتىڭ ايتۋىنشا، بۇل شارتاراپقا تاراپ كەتكەن Whatsapp (WeChat)- تىڭ قازاقستاندىق بالاماسى بولماق. ياعني iTys تۇڭعىش رەت قازاقستاندىق ماماندار جاساپ شىعارعان جەدەل حابار الماسۋعا ارنالعان موبيلدىك قوسىمشا.
«iTys ورىس جانە اعىلشىن تىلدەرىندە عانا ەمەس، ەڭ باستىسى قازاق ءالىپبيىنىڭ بارلىق ارىپتەرىن پايدالانىپ، مەملەكەتتىك تىلدە حابار الماسۋعا بولاتىندىعىمەن ەرەكشەلەنەدى. بۇل ونى قازىرگى كەزدە قولدانىستا جۇرگەن بەلگىلى مەسسەندجەرلەردەن دارالاپ، ءاربىر قازاقستاندىققا ارنالعان، تولىقتاي ۇلتتىق ІТ - ءونىم رەتىندە تانىتا الادى. جاڭا وتاندىق ءونىم مەملەكەتتىك ءتىلدى دامىتۋدا، ءۇش تۇعىرلى ءتىل جانە قازاق ءتىلىن قارقىندى دامىپ كەلە جاتقان اقپاراتتىق ورتاعا بەيىمدەۋ تۋرالى ەلباسى نۇرسۇلتان نازاربايەۆ جۇكتەگەن مىندەتتەرگە تولىعىمەن ساي كەلەدى»، - دەپ اتاپ ءوتتى ا. شاۋەيەۆ.
ونىڭ ايتۋىنشا، iTys قوسىمشاسىنىڭ ەڭ باستى ەرەكشەلىگى - ونىڭ ۇلتتىق مانەردە ايشىقتالعان، مەملەكەتتىك تىلدە قولدانۋعا بولاتىن ەكسكليۋزيۆتى ينتەرفەيسى مەن ءمازىرى.
«ياعني iTys-تاعى يۋارلىق سمايليكتەر قازاقتىڭ ۇلتتىق ناقىشىندا جاسالعان. سونىمەن قاتار، قوسىمشانىڭ تاعى ءبىر ماڭىزدى قىرى - باسقا مەسسەندجەرلەر سياقتى قولدانۋ ءۇشىن تولەم تالاپ ەتپەيدى. كەز كەلگەن ادام ونى iTys.kz سايتىنان تەگىن جۇكتەپ الىپ، تەگىن قولدانا الادى. وسىنىڭ بارلىعى حابار الماسۋعا ارنالعان تۇڭعىش قازاقستاندىق موبيلدى قوسىمشا - iTys-تى تەك تارتىمدى، قىزىقتى ەتىپ قويماي، قازاقستاننىڭ كەز كەلگەن تۇرعىنى ءۇشىن مەيلىنشە قولجەتىمدى ەتەدى»، - دەيدى ا. شاۋەيەۆ.
iTys-تىڭ تاعى ءبىر ەرەكشەلىگى - وندا جەكە حاتتاردىڭ قۇپيالىلىعىن ساقتاۋعا مۇمكىندىك بەرەتىن حابارلامالاردى اۆتوماتتى تۇردە ءوشىرۋ فۋنكياسى بار. مۇنداي قىزمەت الەمدەگى ءبىر دە ءبىر مەسسەندجەردە جوق.
ا. شاۋەيەۆتىڭ ايتۋىنشا، iTys سونىمەن قاتار ونى جەتىلدىرۋگە ءاربىر قازاقستاندىق ءوز ۇلەسىن قوسا الاتىن حالىقتىق مەسسەندجەر بولىپ تابىلادى.
ايتا كەتەيىك، قازىرگى تاڭدا قوسىمشانى جۇكتەۋ Android وپەراتسيالىق جۇيەسى بار سمارتفوندار ءۇشىن قولجەتىمدى. جوبانى جاساۋشىلار جەلتوقسان ايىندا iOC پلاتفورماسىنا شىعۋدى كوزدەپ وتىر.
جوبا جەتەكشىلەرىنىڭ ايتۋىنشا، بولاشاقتا iTys اياسىندا تەگىن دىبىستىق قوڭىراۋلار، قازاق ءتىلىنىڭ اۆتوكوررەكتورى، گرافيكالىق رەداكتور، سونداي- اق ۇلتتىق ۇلگىدەگى جاڭا انيماتسيالار مەن ستيكەرلەر قىزمەتىن قوسۋ كوزدەلىپ وتىر.
اۆتور: ءابۋ- اسقار مەكەش ۇلى
