جەكەشەلەندىرۋ قۇر اشەيىن جەكەشەلەندىرۋ ءۇشىن جۇرگىزىلمەيدى - ك. ءماسىموۆ
«ۇكىمەت الدىنا ەلباسى جۇكتەگەن ماڭىزدى تاپسىرمالاردىڭ ءبىرى وسى - جەكەشەلەندىرۋدىڭ ەكىنشى تولقىنىن جۇزەگە اسىرۋ. بۇل رەتتە ءبىرقاتار اسا ماڭىزدى اسپەكتىلەر بار. جەكەشەلەندىرۋ اياسى تار ماقسات ەمەس، ويتكەنى، مەملەكەتتىك مەنشىكتە تۇرىپ-اق تابىستى قىزمەت دامىپ جاتقان ەلدەر دە بار، سوسىن تۇگەلدەي جەكەمەنشىككە وتكىزگەن، ءبىراق دامۋى سونشالىقتى ماقتانارلىق ەمەس مەمەلكەتتەر دە بار. سوندىقتان دا جەكەشەلەندىرۋ قۇر اشەيىن جەكەشەلەندىرۋ ءۇشىن ەمەس، ەكونوميكالىق قىزمەتتىڭ تيىمدىلىگىن ارتتىرۋ ءۇشىن جاسالۋى كەرەك»، - دەدى ك. ءماسىموۆ.
سونىمەن قاتار، ۇكىمەت باسشىسى قازىرگى الەمدىك ەكونوميكادا جەكەشەلەندىرۋگە قاتىستى كوپتەگەن قايشى پىكىرلەر بار ەكەنىن دە اتاپ ءوتتى. ماسەلەن، ەكونوميست ساراپشىلار مەنشىك ءتۇرى ماڭىزدى ەمەس، ماڭىزدىسى باسقارۋ جۇيەسى ەكەنىن ايتىپ جاتىر.
«مەنىڭ پايىمىمشا، جەكەشەلەندىرۋدىڭ بۇگىنگى تولقىنى شارۋاشىلىق قىزمەتتى باسقارۋدى ءتيىمدى ەتە ءتۇسۋى كەرەك. ءبىز بۇل باعىتتا تاجىريبە جيناقتاپ جاتىرمىز. اي سايىن جەكەشەلەندىرۋدىڭ بارىسىن ۇكىمەتتە تالقىلاۋدامىز. قارجى ءمينيسترى اپتا سايىن سەلەكترلىق كەڭەس وتكىزىپ، مەملەكەتتىك ورگاندار اراسىندا جۇمىستى ۇيلەسىمدى ەتۋگە بارىن سالۋدا. بيىلعى جىلى جالپى العاندا 171 نىسان جەكەشەلەندىرۋگە شىعارىلادى. بۇل باعىتتا ءبىر وڭىرلەردە بەلسەندىلىك بايقالسا، ەندىگى ءبىر وڭىردە باياۋ جۇرۋدە. دەگەنمەن، ەڭ باستىسى اشىقتىق»، - دەدى ك. ءماسىموۆ.
سونىمەن قاتار، پرەمەر جەكەشەلەندىرۋ شاراسىنا وتاندىق ينۆەستورلاردىڭ بەلسەندى قاتىسقانى وزەكتى ەكەنىن ايتا كەلە، وزدەرىنىڭ جاڭا تەحنولوگيالارىمەن، جاڭا باسقارۋ تاسىلىمەن شەتەلدىك ينۆەستورلاردىڭ كەلگەنى دە ماڭىزدى ەكەنىن اتاپ ءوتتى. «ءبىز شەتەلدىك ينۆەستورلارمەن بەلسەندى ديالوگقا بارىپ، ولاردى قوسىمشا ينۆەستيتسياسىمەن ەلىمىزگە كەلۋگە شاقىرىپ جاتىرمىز»، - دەدى ۇكىمەت باسشىسى.
اۆتور: قانات مامەتقازى ۇلى
