ەۋرازيا بارىسىندا ەل نامىسىن قورعايتىن پالۋاندارىمىز انىقتالدى
اتاپ ايتقاندا، ءدۇبىرلى دوداعا قاتىساتىن 1990-جىلى دۇنيەگە كەلگەن ابزال ارىستانبەكوۆتىڭ بويى - 170 سانتيمەتر، سالماعى: 62 كەلى. ول - قازاق كۇرەسىنەن قازاقستان چەمپيونى (2013 ج.)، الەم چەمپيونى (2013 ج.) ازيا چەمپيونى (2014 ج.). ال 1993-جىلى تۋعان پالۋان قايرات اعىبايەۆ (بويى - 168 سانتيمەتر، سالماعى - 72 كەلى) دزيۋدودان جاستار اراسىندا قازاقستان چەمپيونى (2012 ج.)، ەۋروپا كۋبوگىنىڭ قولا جۇلدەگەرى (2012 ج.) جانە دزيۋدودان جاستار اراسىندا وتكەن ازيا چەمپيوناتىنىڭ قولا جۇلدەگەرى (2013 ج.). بويى 179 سانتيمەتر، سالماعى - 81 كەلى داۋلەتحان جاقىپوۆ 1992-جىلى دۇنيەگە كەلگەن. ول - 2013-جىلى قازاق كۇرەسىنەن قازاقستان چەمپيوناتىنىڭ كۇمىس جۇلدەگەرى جانە ازيا چەمپيوناتىنىڭ قولا جۇلدەگەرى، 2014-جىلى «قازاقستان بارىسىندا» ءتورتىنشى ورىن العان ءارى ءدال وسى جىلى دزيۋدودان قازاقستان چەمپيونى اتانعان. جارىستا باعىن سىنايتىن مۇحيت تۇرسىنوۆ (بويى - 185 سانتيمەتر، سالماعى - 95 كەلى) 1988-جىلى دۇنيەگە كەلگەن، قازاق كۇرەسىنەن الەم كۋبوگىنىڭ جەڭىمپازى (2011 ج.)، قازاق كۇرەسىنەن الەم چەمپيونى (2013 ج.)، 2014-جىلى قازاقستان بارىسى (2014 ج.). 1987-جىلى دۇنيەگە كەلگەن ايبەك نۇعىماروۆتىڭ بويى - 189 سانتيمەتر، سالماعى - 138 كەلى. ول قازاق كۇرەسىنەن ەكى دۇركىن ازيا چەمپيونى (2011, 2014 ج ج.)، ەكى دۇركىن الەم چەمپيونى (2011, 2013 ج ج.)، قازاقستان بارىسى (2013 ج.) جانە «الەم بارىسى» حالىقارالىق ءتۋرنيرىنىڭ ۆيتسە-چەمپيونى (2014 ج.).
ەستەرىڭىزگە سالا كەتەيىك، 22- قاراشادا تارازدا بالۋان شولاقتىڭ 150 جىلدىعىنا ارنالعان قازاق كۇرەسىنەن ІІ «Eurasia Barysy» حالىقارالىق ءتۋرنيرى وتەدى. وعان قازاقستان پالۋاندارىنان بولەك، قىتاي، ازەربايجان، قىرعىزستان، گرۋزيا، پولشا، موڭعوليا، تاجىكستان، رەسەي، تۇركيا، ۋكراينا جانە وزبەكستان ەلدەرىنىڭ قۇرامالارى قاتىسادى. جارىس بەس سالماق دارەجەسى بويىنشا كوماندالىق سايىس تۇرىندە وتكىزىلەدى. ءتۋرنيردىڭ جالپى جۇلدە قورى ءجۇز مىڭ ا ق ش دوللارىن قامتىپ وتىر.
جوبانى «قازاقستان بارىسى» قازاق كۇرەسىن دامىتۋ قورى، ق ر قازاق كۇرەسى فەدەراتسياسى، جامبىل وبلىسىنىڭ اكىمدىگى ۇيىمداستىرىپ وتىر. ال وسى ايتۋلى سپورتتىق دوداعا «سامۇرىق-قازىنا» ۇلتتىق ءال-اۋقات قورى باس دەمەۋشىلىك ەتپەك.
