09:06, 20 - قاراشا 2014 | GMT +6
سەمەي تۇرعىنى شىنى شولمەكتەردەن مونشا تۇرعىزدى
استانا. قازاقپارات - سەمەي تۇرعىنى الەنحان زاكيەۆ شىنى شولمەكتەردەن مونشا تۇرعىزدى. باسىلىم بەتتەرىن پاراقتاپ وتىرىپ، ەرەكشە قۇراستىرۋ جوباسىن بايقاپ قالعان ازامات دەرەۋ ىسكە كىرىسىپ كەتەدى.
كوشەدە شاشىلىپ جاتقان بوس شولمەك كوپ بولعاندىقتان قۇرىلىس ماتەريالىن تابۋ اسا قيىندىق تۋدىرمادى، دەپ جازادى 24.kz.
5 مىڭداي شىنى قۇتىدان قالانعان مونشا قۇرىلىسىنا 3 ايداي ۋاقىت كەتىپتى. وسىلايشا الەنحان ءوز شارۋاسىنا قاجەتتى نىسان تۇرعىزۋمەن قاتار قالانىڭ تازارۋىنا دا ۇلەس قوسىپ وتىر. قازىردە كۇن نۇرىنا شاعىلىسقان مونشا قالالىقتار مەن الىس-جاقىن اۋىلداردان كەلگەن قوناقتاردىڭ قىزىقتاپ قارايتىن ورىنىنا اينالعان. ءتىپتى الەنحاننان مونشانىڭ ۇلگىسىن سۇراۋشىلار كوبەيىپتى.
«استىڭعى ەدەنى دە شولمەك، ۇزىندىعى - 28 سانتيمەتر ۆاكۋۋم اۋا، كۇن كوزىنىڭ جىلۋى ىشتەگى اۋانى جىلىتادى. كوپ وتىن دا كەتپەيدى، ءوزى ىسىپ شىعا كەلەدى. ماتەريال تاپپاعاندىقتان ەمەس، ءبىر جاعىنان ونەر»، - دەيدى ول.
