عالىمدار الماتىنىڭ اۋاسىن الىپ فيلتر ارقىلى تازالاۋدى ۇسىندى
الىپ فيلتر جاساندى سارقىرامانىڭ كومەگىمەن جاسالماق.
«كازگيپروۆودحوز» جوبالىق كومپانياسى باسقارما ءتوراعاسىنىڭ عىلىمي- تەحنيكالىق ماسەلەلەر بويىنشا ورىنباسارى سەرىك بۇركىتبايەۆتىڭ ايتۋىنشا، ول ءۇشىن الماتىنىڭ وڭتۇستىگى مەن سولتۇستىگىنىڭ اراسىندا جاتقان ۇلكەن الماتى كانالىنىڭ ۇستىنەن 10-30 مەتر بيىكتىكتە جەڭىل ارىقتىق كونسترۋكسياسى جاسالادى.
«سۋ ارىق ارقىلى ۇلكەن الماتى كانالى باستاۋ الاتىن جەردەن باستاپ كەلەدى. ارىق تولعان كەزدە تامشىلاۋ ارقىلى اۋاداعى لاس زاتتاردى ءسىڭىرىپ ءبىر جەرگە شوعىرلاندىرادى. وزدەرىڭىزگە بەلگىلى الماتىنىڭ اۋاسى تاۋلى- جازىقتىق سيركۋلياتسيا ارقىلى وزگەرىپ تۇرادى. تاڭەرتەڭ لاس اۋا جەردە تۇرسا، تۇسكە قاراي كۇننىڭ جىلىنۋىمەن جوعارى تاۋ جاققا كەتەدى. كەش باتىسىمەن سول لاس اۋا قالاعا قايتا كەلەدى. ءدال وسى كەزدە ءبىز كۇنىنە ەكى رەت ارىقتاردان توگىلگەن سارقىراما ارقىلى اۋانى تازالاپ الامىز» ، - دەدى سەرىك بۇركىتبايەۆ.
ق ر كولىك جانە كوممۋنيكاسيالار ەكس- ءمينيسترى وسىنداي اسپالى ارىقتاردى ۇلكەن جانە الماتى، ەسەنتاي وزەندەرىندە دە ورناتسا، تىپتەن جاقسى بولادى دەپ سانايدى.
اتالعان جوبانىڭ قۇنى 100 ميلليون دوللارعا باعالانىپ وتىر.
«العاشقى كەزەڭىنە 10-20 ميلليون دوللار جەتكىلىكتى. مەنىڭشە، عالىمدار مەن ەكولوگتار قولداسا، قارجىلاندىرۋ بيزنەستەن دە كەلەتىن بولىپ وتىر. ەگەر، رۇقسات بەرىلسە، جەكە ينۆەستيتسيالار دا تارتىلۋى مۇمكىن»، - دەدى س. بۇركىتبايەۆ.
قوعامدىق تىڭداۋعا قاتىسقان ەكولوگتار جوبانىڭ بىرەگەيلىگىن تىلگە تيەك ەتكەنمەن، بۇل الماتى سۋ قورىنىڭ ازايۋىنا اكەلەدى دەگەن توقتامعا كەلدى. ونىڭ ايتۋىنشا، قازىر الماتى تاۋلارىنداعى مۇزدىقتاردىڭ 40 پايىزى ەرىپ كەتكەن. سۋدىڭ تومەنگە اعىسى كەزىندە دە سۋدىڭ تەڭ جارتىسى بۋعا اينالادى دەدى «تابيعات» ەكولوگيالىق وداعىنىڭ ءتوراعاسى مەلس ەلەۋسىزوۆ.
اۆتور: گۇلميرا عوسمانالي
