قازاقستاندىقتار جەمقورلىقتىڭ بەلەڭ الۋىنا تۇرتكى بولاتىن سەبەپتەردى اتادى

استانا. قازاقپارات - قازاقستاندا جەمقورلاردىڭ سانىن ازايتۋ ءۇشىن قۇقىق قورعاۋ ورگاندارىنىڭ قۇزىرەتىن ارتتىرىپ، زاڭدى كۇشەيتۋ قاجەت.

بۇل - ساۋالناماعا قاتىسقان ازاماتتاردىڭ 75 پايىزىنىڭ پىكىرى.

وسى جىلدىڭ تامىز-قىركۇيەك ايلارىندا «نۇر وتان» پارتياسىنىڭ قوعامدىق ساياسات ينستيتۋتى «قوعامدىق پىكىر» زەرتتەۋ ينستيتۋتىمەن بىرلەسىپ، سىبايلاس جەمقورلىقتىڭ تارالۋ جولدارىنا قاتىستى 14 وبلىس پەن استانا جانە الماتى قالالارىندا ساۋالناما جۇرگىزگەن.

وسىلايشا پارتيا زەرتتەۋ ناتيجەسىنە سۇيەنە وتىرىپ، قوعامدا سىبايلاس جەمقورلىقتى قابىلداۋدىڭ ۇلتتىق يندەكسىن دايىنداماق. بۇگىن ينستيتۋت وكىلدەرى سول ساۋالنامانىڭ ناتيجەلەرىن جاريا ەتتى. «سىبايلاس جەمقورلىققا قارسى كۇرەستى قالاي باعالايسىز؟» دەگەن سۇراققا رەسپوندەنتتەردىڭ 45,2 پايىزى «وڭ باعالايمىن» دەپ جاۋاپ بەرسە، 33,1 پايىزى كۇرەس تەك قوعامدىق پىكىردى تىنىشتاندىرۋ ءۇشىن جۇرگىزىلەتىندىگىن العا تارتىپتى. ال 11,8 پايىزى وزگەرىستەر بايقالمايدى دەپ ەسەپتەيدى.

ساۋالناماعا قاتىسقاندار جەمقورلىقتىڭ بەلەڭ الۋىنا تۇرتكى بولاتىن 6 سەبەپتى اتاپتى. ولار -  شەنەۋنىكتەردىڭ تابىستارى مەن شىعىندارىنا باقىلاۋدىڭ جەتكىلىكسىزدىگى، سوت جۇيەسىنىڭ السىزدىگى، بيۋدجەت سالاسى قىزمەتكەرلەرىنىڭ الاتىن جالاقىسىنىڭ تومەندىگى، سىبايلاس جەمقورلىق دەرەكتەرى بويىنشا جازانىڭ جەڭىل بولۋى، قوعامدىق باقىلاۋدىڭ جوقتىعى.

بوتاگوز راقىشەۆا، «قوعامدىق پىكىر» زەرتتەۋ ينستيتۋتىنىڭ ديرەكتورى:

- ساۋالناماعا 1600 رەسپوندەنت قاتىستى. ولاردىڭ قاتارىندا مەملەكەتتىك قىزمەتكەرلەر، ۇكىمەتتىك ەمەس ۇيىم وكىلدەرى، كاسىپكەرلەر، ستۋدەنتتەر، بالا كۇتىمىمەن ۇيدە وتىرعان انالار دا بار. سوندىقتان ساۋالناما ناتيجەسىن بۇكىل قازاقستاندىقتار پىكىرى دەپ باعالاۋعا بولادى.

24.kz