09:00, 18 - قاراشا 2014 | GMT +5
پراگادا مىڭداعان ادام ەل پرەزيدەنتىنىڭ وتستاۆكاعا كەتۋىن تالاپ ەتتى
استانا. قازاقپارات - مىڭداعان ادام پراگادا چەحيا رەسپۋبليكاسىنىڭ پرەزيدەنتى ميلوش زەماننىڭ وتستاۆكاعا كەتۋىن تالاپ ەتىپ شەرۋگە شىقتى.
«پرەزيدەنت ءبىزدىڭ ارقامىزدا ەل بيلىگىن قولعا الدى. الايدا، ءبىزدىڭ پىكىرىمىزشە، ول ءوز مىندەتىن سايكەسىنشە ورىنداپ جاتقان جوق»، - دەدى اكسيا ۇيىمداستىرۋشىسى مارتين پرشيكرىل.
پراگا پوليتسياسىنىڭ وكىلى حابارلاعانداي، شەرۋدە جاپا شەككەندەر بولمادى. پراگانىڭ كلاروۆ اۋدانىندا ميلوش زەماندى جاقتاۋشىلار دا شەرۋ وتكىزدى. بۇل شارا 60 ادامنىڭ باسىن قوستى.
ميلوش زەمانعا قارسى تاعى ءبىر اكسيا چەحيا اۋماعى بويىنشا ەكىنشى ورىنداعى برنو قالاسىندا ءوتتى. وعان 500 دەن استام ادام قاتىستى.
ميلوش زەماننىڭ وتستاۆكاعا كەتۋىن تالاپ ەتۋ ناۋقانى 2- قاراشادا چەحيالىق راديوعا بەرگەن سۇحباتتا پرەزيدەنت چەحيادا بىلاپىت ءسوز دەپ ەسەپتەلەتىن بىرنەشە ءسوزدى قولدانعاننان كەيىن باستالعان.
