باتىس ەۋروپا-باتىس قىتاي كولىك ءدالىزى تابىس كوزىنە اينالدى
«نۇرلى جول» اتالاتىن اۆتو ءدالىز بويىندا وبلىس حالقىنىڭ باسىم بولىگى تۇرىپ جاتىر. جاڭا نىساندار دا بوي كوتەرىپ، جەرگىلىكتى حالىققا جۇمىس ورىندارى اشىلا باستادى. باتىس پەن شىعىستى جالعاپ جاتقان عاسىر قۇرىلىسىنىڭ 495 شاقىرىمى جامبىل وبلىسىنا تيەسىلى. كەلەشەكتە وسى جول بويىنان 100 گە جۋىق تاۋارلى فەرمالار بوي كوتەرەدى. سەگىز سەرۆيستىك قىزمەت كورسەتۋ كەشەنى سالىنادى دەپ جوسپارلانعان. بۇل - مىڭداعان جاڭا جۇمىس ورىندارى اشىلادى دەگەن ءسوز.
قازىردىڭ وزىندە كوپشىلىك اقىرتوبە اتاپ كەتكەن ەلدى مەكەندە كاسىپكەرلەردىڭ اراسىندا باسەكەلەستىك بار. ويتكەنى مۇندا ءدامحانا بيزنەسى جاقسى دامىعان. حالىقارالىق كولىك ءدالىزىنىڭ ارقاسىندا قازىر مۇنداعى جۇرتتىڭ قول-اياعى ۇزارعان. وبلىس ورتالىعى مەن كەزىندە شالعاي سانالعان ەلدى مەكەندەرگە بارىس-كەلىس جاقساردى. ءبىر ەلدەن ەكىنشى ەلگە قاتىناپ، تاۋار تاسىمالداپ جۇرگەن جۇرگىزۋشىلەر ءۇشىن دە جولدىڭ شاراپاتى مول.
سەرگەي بروتت، ۋكراينالىق جۇرگىزۋشى: - مەن قازاقستان جەرىمەن العاش رەت ءجۇرىپ وتىرمىن. شىنىمدى ايتسام، مۇندا ءدال وسىنداي ساپالى جول بار دەپ ويلاماپپىن، تاڭ قالدىم.
الەن سەيىتبەكوۆ، اۋىل تۇرعىنى: - بۇل - حالىقتىڭ ىرىسى. حالىققا بەرگەن ءناسىپ. وسى جەردە 50-60 ادامداي جۇمىس ىستەيدى. ەلباسىنىڭ كورەگەندىگى. سول كىسىنىڭ بىزگە ىستەگەن جاقسىلىعى. جاڭا تۇرمىس اۋىلى كۇرە جولدىڭ بويىندا ورنالاسقان. قۇرىلىسى جوسپارلانعان فەرمالاردىڭ العاشقىسى وسى ەلدى مەكەننەن اشىلدى.
50 باس ءىرى قارا ءوسىرىپ جاتقان شارۋاشىلىق ەندى ونىڭ ءسۇتىن دە كادەگە جاراتىپ وتىر. ءونىم كورشى اۋدانداعى زاۋىتتا وڭدەلەدى.
وراق باتىربەك، كاسىپكەر: - بىزگە ءسۇتتى مەركىنىڭ سىر زاۋىتىنا جەتكىزۋ كەرەك. ونىڭ جىلدام جەتكىزبەسە بولمايدى. سوندىقتان وسى جولدىڭ سەپتىگى كوپ تيەدى. جاڭادان بوي كوتەرگەن فەرمادا 15 ادام تۇراقتى جۇمىس ىستەيدى. بارلىعى جەرگىلىكتى تۇرعىندار. ناۋقان كەزىندە مەحانيزاتورلاردى قوسقاندا 30 ادام ەڭبەككە تارتىلادى. بۇدان بولەك بولاشاقتا فەرما جانىنان جولاۋشىلارعا سەرۆيستىك قىزمەت كورسەتۋ ورىندارى سالىنباق.
زەينەل- ءنابي سۇلتانبايەۆ، وبلىستىق كاسىپكەرلىك جانە يندۋستريالدى- يننوۆاتسيالىق دامىتۋ باسقارماسى باسشىسىنىڭ ورىنباسارى: - تۋريستىك جۇمىس كورسەتۋ پۋنكتتەرىن اشۋ ارقىلى جالپى كولەمى 160 ادام جۇمىسپەن قامتاماسىز ەتىلەدى. وسى پۋنكتتەرگە 2,4 ميلليارد تەڭگە كولەمىندە ينۆەستيتسيا تارتىلىپ وتىر. جىل وتكەن سايىن كولىك قىزمەتى ەكسپورتى تابىستى بيزنەس تۇرىنە اينالىپ كەلەدى. جول قۇرىلىسى اياقتالسا، ونىڭ ەلىمىزدىڭ ەكونوميكاسىنا تيگىزەر پايداسى وراسان بولماق.
اۆتورلارى: رۋسلان باقىتبەك ۇلى، تيمۋر سەيىلحان، ءجانيا قاراشولاقوۆا
