قازاقستاننىڭ ۇلتتىق قۇراماسىنا كىرمەگەن چەمپيون
22 جاستاعى جاسۇلان قىدىربايەۆ سپورتپەن 13 جاسىنان اينالىسا باستاعان. العاشىندا گرەك- ريم كۇرەسىنىڭ ۇيىرمەسىنە قاتىسقان. اۋىر اتلەتيكا سەكسياسىنا سپورت سالاسىندا جۇمىس ىستەيتىن تۋىسىنىڭ كەڭەسىمەن اۋىسقان ەكەن.
- ءاۋ باستا تالعاردا گرەك- ريم كۇرەسى ۇيىرمەسىنە بارىپ ءجۇردىم. 2006 - جىلى الماتىداعى قاركەن احمەتوۆ اتىنداعى سپورت مەكتەبىنە ءتۇستىم. سول كەزدە اۋىر اتلەتيكادان وليمپياداعا دايارلاۋ ورتالىعىندا جۇمىس ىستەيتىن اعام بەكەن بەكمۇحامبەتوۆ اۋىر اتلەتيكامەن اينالىسقانىمدى قۇپ كوردى، - دەيدى ول.
2008 - جىلى جاسۇلان شىمكەنتتە وتكەن جاسوسپىرىمدەر اراسىنداعى قازاقستان چەمپيوناتىندا 1- ورىن العان. 2011 - جىلى بىشكەكتە وتكەن قانىبەك وسماناليەۆ اتىنداعى حالىقارالىق تۋرنيردە 1- ورىن الىپ، العاش رەت شەتەل ماماندارىنا تانىلدى. 2011 - جىلدىڭ سوڭىندا تايلاندتا وتكەن جاسوسپىرىمدەر اراسىنداعى ازيا چەمپيوناتىنا قاتىسىپ، 94 كيلوگرام سالماق بويىنشا التىن مەدال ۇتتى.
- العاشقى باپكەرىم داۋرەن ءادىلعازين ماعان سەندى. باپكەرىمنىڭ جاتتىعۋلاردا مەنى قاتتى قيناعان كەزدەرى دە بولدى. ءبىراق مەن وعان شىدادىم. تايلاندتاعى ازيا چەمپيوناتىندا جەڭىسكە جەتكەنىمدە قاتتى قۋاندىم. سول كەزدە باپكەرىم «بۇل باسى عانا» دەپ ارقامنان قاققان ەدى، - دەيدى جاسۇلان قىدىربايەۆ.
دوپينگ داۋى
2012 - جىلى مامىر ايىندا جاسۇلان قىدىربايەۆ ارۋبادا (گۆاتەمالا) وتكەن جاستار اراسىنداعى الەم چەمپيوناتىنا قاتىسىپ، قولا جۇلدە يەلەندى. ول سول جىلى قاراشا ايىندا ميانمادا وتكەن جاستار اراسىنداعى ازيا بىرىنشىلىگىندە باس جۇلدەنى جەڭەدى.
الايدا 2013 - جىلدىڭ قاڭتار ايىندا حالىقارالىق اۋىر اتلەتيكا فەدەراتسياسى ميانمادا وتكەن جارىستا جاسۇلاننىڭ قانىنان دوپينگ تابىلعانىن حابارلاپ، ونى ەكى جىل سپورتتان شەتتەتتى. جاسۇلان التىن مەدالىن قايتارىپ بەردى.
- دوپينگ ماسەلەسىنە ەشكىمدى كىنالامايمىن. قالاي بولعانىن، دوپينگتىڭ قالاي شىققانىن ءالى تۇسىنبەي ءجۇرمىن. ەكى جىل سپورتتان شەتتەتىلسەم دە، جاتتىعۋدى تاستامادىم. «بۇل قالاي بولدى؟» دەپ قاتتى قينالعان كەزدەرىم دە بولدى. ءبىراق ءوزىمدى سابىرمەن جەڭدىم. ەكى جىل وتە شىقتى. سول ۋاقىت ىشىندە ۇيلەندىم، بالا ءسۇيدىم، - دەيدى الەم چەمپيونى.
ءبىر قىزىعى، قىدىربايەۆتى سپورتتان شەتتەتۋ مەرزىمى 2014 - جىلى قاراشانىڭ 11- كۇنى اياقتالدى. ياعني، كەسىمدى مەرزىم بىتكەننەن ءتورت كۇن وتكەندە، قاراشانىڭ 15- كۇنى ول الماتىدا الەم چەمپيونى اتاندى.
الماتىداعى جەڭىسى جايلى
جاسۇلان قىدىربايەۆ الماتىداعى الەم چەمپيوناتىنا 94 كيلوگرامم سالماق كاتەگورياسى بويىنشا قاتىستى. الەم چەمپيونى قوس سايىس قورىتىندىسى بويىنشا 408 كيلوگرامم كوتەردى. وسى سالماق كاتەگورياسى بويىنشا كۇمىس مەدالدى تاعى ءبىر قازاقستاندىق اتلەت ۆلاديمير سەدوۆ (407 ك گ) الدى. قىدىربايەۆ جارىسقا شىققان كۇنى بالۋان شولاق اتىنداعى سپورت سارايىنا اتا- اناسى، جارى، بالاسى جانە دوستارى كەلىپ قولداۋ كورسەتتى. سپورتشى «ءار شىققان سايىن اكەمنىڭ كوزىندەگى سەنىمنەن كۇش الدىم» دەيدى.
اكەمنىڭ مەنەن كوزىن الماي تۋرا قاراپ وتىرعانىن بايقادىم. بۇل ماعان كۇش بەردى.
- الەم چەمپيوناتىندا جۇلدە الاتىنىما سەندىم. زىلتەمىردى كوتەرۋگە شىققاندا اكەم مەن انام تۋرا الدىمداعى تريبۋنادا وتىردى. اكەمنىڭ مەنەن كوزىن الماي تۋرا قاراپ وتىرعانىن بايقادىم. بۇل ماعان كۇش بەردى. ال انام مەن جارىم جەڭگەن كەزىمدە قۋانعاننان جىلاپ تۇردى. الەم چەمپيونى ەكەنىمدى ەندى سەزىنىپ جاتىرمىن. بۇيىرسا، بۇل - مەنىڭ جەتىستىكتەرىمنىڭ باسى، - دەيدى جاسۇلان قىدىربايەۆ.
«يلين كومانداسىنىڭ» ىشىندەگى باسەكە
قازاقستان اۋىر اتلەتيكاسىندا 94 كيلوگرام سالماق كاتەگورياسى بويىنشا سپورتشىلار اراسىندا باسەكە قاتتى. بۇل سالماقتا 2009 -جىلعى الەم چەمپيونى، وسى جولى كۇمىس مەدال العان ۆلاديمير سەدوۆ؛ 2008 - جىلعى ازيا چەمپيونى (وڭتۇستىك كورەيا) ، 2013 - جىلعى الەم چەمپيوناتىنىڭ (پولشا) كۇمىس جۇلدەگەرى الماس وتەشوۆ بار. قىدىربايەۆ مۇنداي باسەكە سپورتشى رەتىندە دامۋىنا كوپ سەپتىگىن تيگىزگەنىن ايتادى.
- وتەشوۆ، سەدوۆ ۇشەۋىمىز ءبىر سالماقتامىز جانە ءبىر زالدا جاتتىعامىز. ول ەكەۋى - جارىستا قارسىلاسىم بولعانىمەن، ومىردە اعالارىم. جارىستا كىم مىقتى شىقسا، شىن جۇرەكتەن قۇتتىقتاپ جاتامىز، - دەيدى ول.
جاسۇلان قىدىربايەۆ (وڭ جاقتا) پەن باپكەرى ەرجاس بولتايەۆ
يليا يلين، جاسۇلان قىدىربايەۆ، ۆلاديمير سەدوۆ، الماس وتەشوۆ تاراز قالاسىندا بىرگە جاتتىعادى. قازاقستان اۋىر اتلەتيكاسىندا بىرنەشە الەم چەمپيونىن شىعارعان تانىمال باپكەر الەكسەي ني «توبىنان» بولەك جاتتىعاتىن بۇل شوعىر بەيرەسمي تۇردە «يليا يليننىڭ كومانداسى» اتانىپ كەتكەن.
ەندى ەكى جىلدان كەيىن ريو- دە- جانەيرو وليمپيادا ويىندارى وتەدى. 94 كيلوگرام سالماق بويىنشا بۇل وليمپياداعا ەرلەر اراسىندا قازاقستاننان تەك ەكى سپورتشى قاتىسۋى ءتيىس. وليمپياداعا بارۋدان قىدىربايەۆتان بولەك، وتەشوۆ تە، سەدوۆ تا ۇمىتتەنەدى. ال باپكەرلەر ءۇش سپورتشىنىڭ دا وليمپياداعا قاتىسۋعا مۇمكىندىگى تەڭ ەكەنىن ايتادى.
- وليمپيادا الدىندا كىم مىقتى بولادى - سول ريو- دە- جانەيروعا بارادى. ءبىر ايتارىم، وسى وليمپيادادا 94 كيلوگرام سالماق كاتەگورياسى بويىنشا التىن مەن كۇمىستى قازاقستان الۋى ءۇشىن بارىمىزدى سالامىز، - دەيدى جاسۇلاننىڭ باپكەرى داۋرەن ءابىلعازين.
ۇلتتىق قۇراماعا كىرمەيتىن چەمپيون
جاسۇلان قىدىربايەۆتىڭ جاتتىعۋعا كەتەتىن، جارىستارعا باراتىن شىعىندارىن دەمەۋشىلەرى تولەيدى.
- قازاقستان ۇكىمەتى ۇلتتىق قۇراماداعى سپورتشىلارعا ايلىق تولەيدى. ال قىدىربايەۆ ۇلتتىق قۇراما مۇشەسى ەمەس، مەملەكەتتەن ستيپەنديا المايدى. ونى ماتەريالدىق تۇرعىدا جامبىل وبلىسىنىڭ سپورت باسقارماسى قامتاماسىز ەتىپ كەلەدى، - دەيدى سپورتشىنىڭ تاعى ءبىر جاتتىقتىرۋشىسى ەرجاس بولتايەۆ.
ال قازاقستان اۋىر اتلەتيكا فەدەراتسياسى وكىلدەرى «قىدىربايەۆتى الەم چەمپيوناتىن ۇتقان سپورتشى رەتىندە ۇلتتىق قۇراماعا قابىلداۋ ماسەلەسى مىندەتتى تۇردە قارالاتىنىن، اتلەتكە مەملەكەتتەن قولداۋ بولاتىنىن» ايتتى.
جاسۇلان قىدىربايەۆ ازاتتىق تىلشىسىمەن اڭگىمەسىندە «بوس ۋاقىتىمدى جارىم مەن كىشكەنتاي قىزىم - ءماريامنىڭ جانىندا وتكىزگەندى قالايمىن. قولىم تيە قالسا، اراب ءتىلىن ۇيرەنىپ، قۇران اۋدارعاندى ۇناتامىن» دەدى.
جاسۇلان قىدىربايەۆتىڭ كەلەسى جارىسى 2015 - جىلى وتەتىن ازيا چەمپيوناتى مەن حيۋستونداعى الەم چەمپيوناتى بولماق.
قاراشانىڭ 8-16- كۇندەرى الماتىدا وتكەن اۋىر اتلەتيكادان الەم چەمپيوناتىندا قازاقستان ءۇش التىن، ەكى كۇمىس مەدالمەن 3- ورىن الدى. ءزۇلفيا چينشانلو (58 ك گ) ، جاسۇلان قىدىربايەۆ (94 ك گ) جانە يليا يلين (105 ك گ) چەمپيون اتاندى. ال جازيرا جاپپارقۇل (69 ك گ) مەن ۆلاديمير سەدوۆ (94 ك گ) كۇمىس جۇلدە يەلەندى. 1- ورىن - قىتايعا (4 التىن، 1 كۇمىس، 6 قولا) ، 2- ورىن سولتۇستىك كورەياعا (4 التىن، 1 كۇمىس، 3 قولا) بۇيىردى.
رۋسلان مەدەلبەك
«ازاتتىق»
