كوشەدە كولىكپەن جۇرۋگە ۋاقىتشا تىيىم سالىندى

استانا. قازاقپارات - ريمدە دەمالىس كۇنى كەيبىر كوشەلەردە جول قوزعالىسى شەكتەلدى.

وندا تەك قوعامدىق كولىك نەمەسە ۆەلوسيپەد ارقىلى قاتىناۋعا بولادى.

بۇعان وتكەن جىلدىڭ جەلتوقسان ايىندا اۋاعا زياندى قالدىقتاردىڭ شامادان تىس تاراۋى سەبەپ بولدى.

جاعدايدى نازاردا ۇستاۋ ماقساتىندا بيلىك وكىلدەرى تاريحي جانە جاسىل بەلدەۋ ايماقتارىندا جىلىنا بىرنەشە رەت جول قوزعالىسىن شەكتەۋ تۋرالى شەشىم قابىلداعان.

كولىك قوزعالىسىنا تاڭەرتەڭ جانە ءتۇس كەزىندە تىيىم سالىنعان. ەرەجەگە باعىنباعاندارعا 100 ەۋرو كولەمىندە سالىق سالىنادى.

مۇنداي قادامعا بيلىك بىلتىرعىداي اۋانىڭ شامادان تىس لاستانۋىنا جول بەرمەۋ ءۇشىن بارىپ وتىر. قالادا 2 ميلليوننان استام اۆتوكولىك، تاعى 100 مىڭ موتوتسيكل بار.

ياعني 1000 تۇرعىننىڭ جان باسىنا شاققاندا 1040 كولىكتەن كەلەدى. بۇل ەۋروپانىڭ باسقا قالالارىمەن سالىستىرعاندا وتە كوپ. ماسەلەن پاريجدىڭ 1000 تۇرعىنىنا 415 كولىكتەن تيسە، لوندوننىڭ ءاربىر ءۇشىنشى ازاماتى جەكەمەنشىك كولىكپەن قاتىنايدى.

كوپ كۇتپەستەن شارا ءوز ناتيجەسىن بەردى. قوعامدىق كولىك توقتاۋسىز ءجۇرىپ تۇرعانىنا قاراماستان، اۋانىڭ لاستانۋى ادەتتەگىدەن تومەن دەيدى، - ماماندار. دەگەنمەن ماسەلە مۇنىمەن بىتپەيدى. توزىعى جەتكەن جەكەمەنشىك جانە قوعامدىق كولىكتەر اۋاعا زياندى قالدىقتاردى كوبىرەك شىعارادى. سونىڭ سالدارىنان حالىق تىعىز ورنالاسقان ريم مەن ميلان سىندى قالالاردىڭ ەكولوگياسى لاستانىپ وتىر.

24.kz