اق ايۋلار جۇتتان قىرىلىپ جاتىر
ەكى ەلدىڭ ماماندارى الياسكانىڭ سولتۇستىگى مەن كانادانىڭ سولتۇستىك- باتىس ايماقتارىندا 2001-2010 - جىلدار ارالىعىندا زەرتتەۋ جۇمىستارىن جۇرگىزگەن. وسى ۋاقىت ىشىندە اق ايۋلاردىڭ باسى 1 ميلليون 600 مىڭنان 900 گە دەيىن قىسقارىپتى.
عالىمداردىڭ ايتۋىنشا، اتالعان اڭدار اسىرەسە 2004-2007 - جىلدارى قاتتى قىرعىنعا ۇشىراعان. بۇل ۋاقىتتا دۇنيەگە كەلگەن 80 باس اق ايۋدىڭ تەك ەكەۋى عانا امان قالىپتى. ال، بۇعان دەيىنگى ۋاقىتتا قونجىقتاردىڭ كەمى 50 پايىزى ءتىرى قالاتىن دەيدى ولار.
«ءبىزدىڭ پايىمداۋىمىزشا، اق ايۋلار اشتان، ياعني جۇتتان ءولىپ جاتىر. ولاردىڭ ءومىر ءسۇرۋ ورتاسى بارىنشا تارىلىپ بارادى» دەيدى ا ق ش گەولوگيالىق قىزمەتىنىڭ قىزمەتكەرى دجەفف برومەگين.
عالىمدار ايۋ سانىنىڭ كەمۋىنە جاھاندىق جىلىنۋ پروسەسىن كىنالاپ وتىر. اركتيكالىق مۇزدىقتاردىڭ ەرۋى سالدارىنان اق ايۋلار جەمتىك اۋلايتىن جەرلەرىنە جەتە الماي، اشتان ءولىپ جاتىر دەيدى زەرتتەۋ توبىنىڭ وكىلدەرى.
NASA- نىڭ مالىمەتتەرىنە سەنەر بولساق، 2013 - جىلى اركتيكالىق مۇزدىڭ كولەمى 5,02 ميلليون شارشى شاقىرىمعا دەيىن قىسقارىپ كەتكەن. بۇل سوڭعى 36 جىلداعى رەكوردتىق كورسەتكىش. ا ق ش گەولوگيالىق قىزمەتىنىڭ ماماندارى وسىعان بايلانىستى دابىل قاعىپ وتىر. ايتۋلارىنشا، ەگەر مۇزدىقتار وسى قارقىنمەن ەري بەرەتىن بولسا اق ايۋلاردىڭ سانى 60-70 پايىزعا دەيىن تومەندەپ كەتۋى مۇمكىن.
