ءار باسشى ناقتى جۇمىستار اتقارىپ، جەتىستىكتەرگە جەتۋ جولدارىن قاراستىرۋى قاجەت - الماتى وبلىسىنىڭ اكىمى
جيىنعا وبلىس باسشىلىعى، اۋداندار مەن قالالاردىڭ اكىمدەرى، وبلىستىق باسقارمالار مەن دەپارتامەنتتەر باسشىلارى، كاسىپوداق جانە جاستار ۇيىمدارىنىڭ وكىلدەرى جانە ءماسليحات دەپۋتاتتارى مەن جۋرناليستەر قاتىستى.
اكتيۆ وتىرىسىندا باستى ماسەلە ەلباسىمىز ن. ءا. نازاربايەۆتىڭ «نۇرلى جول - بولاشاققا باستار جول» اتتى جولداۋىندا بەلگىلەنگەن تاپسىرمالاردى الداعى ۋاقىتتا ىسكە اسىرۋ جۇمىستارى تالقىلانىپ، ءتۇرلى سالا وكىلدەرىنىڭ باياندامالارى تىڭدالدى.
وبلىس اكىمى ا. باتالوۆ جولداۋدا كورسەتىلگەن نەگىزگى 7 باسىم باعىتقا كەڭىنەن توقتالىپ، بۇدان ءارى بۇل باعدارلاما بويىنشا ءتۇسىندىرۋ جۇمىستارىن ساپالى ءارى قىسقا مەرزىم ىشىندە جۇرگىزۋدى تاپسىردى.
«الماتى وبلىسىنىڭ دامۋىنا ەرەكشە كوڭىل بولەتىن مەملدەكەت باسشىسىنىڭ ارقاسىندا وسى باعىتتاردىڭ ءارقايسىسى بويىنشا بىزدە جۇزەگە اسىرىلىپ جاتقان جوبالار بار. بۇل «قۇرعاق پورتىنىڭ» قۇرىلىسى، «قورعاس- شىعىس قاقپاسى» ارنايى ەكونوميكالىق ايماعى، باتىس قىتاي- باتىس ەۋروپا، الماتى- وسكەمەن اۆتوجولى جوبالارى، سونداي-اق ىلە اۋدانىنداعى، وبلىستىق ماڭىزى بار ءۇش قالاداعى يندۋستريالىق ايماقتار، الماتى- تالدىقورعان باعىتىنداعى جوعارى ۆولتتى ەلەكتر جەلىسى مەن گاز قۇبىرىنىڭ قۇرىلىسى. وبلىستا كەلەشەگى بار تۋريستىك ايماقتار بار. بەرىلگەن تاپسىرمالار نەگىزىندە اتقارۋشى ورگانداردىڭ ءار باسشىلارى ناقتى جۇمىستار اتقارىپ، جەتىستىكتەرگە جەتۋ جولدارىن قاراستىرۋ قاجەت»، - دەدى اماندىق باتالوۆ.
سونىمەن قاتار كەلەسى جىلى اتالىپ وتىلەتىن قازاق حاندىعىنىڭ 550 جىلدىعى، ۇلى وتان سوعىسىنداعى جەڭىستىڭ 70 جىلدىعى، قازاقستان رەسپۋبليكاسىنىڭ كونستيتۋتسياسىنا 20 جىل جانە قازاقستان حالقى اسسامبلەياسىنىڭ 20 جىلدىعى سىندى ءبىرقاتار اتاۋلى داتالاردى مەرەكەلەۋ بويىنشا جۇمىستار اتقارۋدى تاپسىردى.
كەڭەس قورىتىندىسىندا وبلىس اكىمىنىڭ ورىنباسارلارىنا، ءبىرقاتار وبلىستىق باسقارمالارعا ناقتى تاپسىرمالار جۇكتەلىپ، سول بويىنشا ناقتى جۇمىستار جۇرگىزۋ ۇسىنىلدى، دەپ حابارلايدى الماتى وبلىسى اكىمىنىڭ باسپا ءسوز قىزمەتىنەن.
