05:21, 12 - قاراشا 2014 | GMT +5
ۇلى بريتانيا «قىرعي قاباق» سوعىستىڭ قايتالانۋىن قالامايدى، الايدا سانكسيالاردى كۇشەيتۋگە دايىن
استانا. قازاقپارات - ۇلى بريتانيا رەسەيگە قارسى سانكسيانى كۇشەيتۋدى قولدايدى. بۇل تۋرالى ەلدىڭ پرەمەر- ءمينيسترى دەۆيد كەمەرون مالىمدەدى. اعىلشىن بيلىگى باسشىسىنىڭ ايتۋىنشا، ماسكەۋ ساياساتى ەۋروپا ايماعىنا قاۋىپ توندىرۋدە.
«بۇل ءبىز كوزدەگەن ماقساتقا قارسى كەلۋدە، ەگەر دە رەسەي ۋكرايناداعى جاعدايدى تۇراقتاندىرماي، شەكاراسىنا تاعى دا قاۋىپ توندىرەتىن بولسا، لوندون ءوز كەزەگىندە رەسەيگە دەگەن قىسىمىن ارتتىراتىن بولادى»، دەدى پرەمەر- مينيستر ءوز سوزىندە. سونداي- اق، كەمەرون بۇل سوزدەرىن الداعى كۇندەرى بريسبەندە وتەتىن G20 سامميتىندە ۆلاديمير پۋتينگە جەكە جەتكىزەتىنىن ايتتى.
ايتا كەتەيىك، رەسەي مەن باتىس اراسىنداعى احۋالدىڭ ناشارلاۋىنا ۋكرايناداعى جاعداي سەبەپ بولدى. قازىرگى تاڭدا ەكى جاق ءبىر- بىرىنە قارسى سانكسيالاردى ەنگىزدى. وسى رەتتە ساياساتكەرلەرمەن قاتار ك س ر و- نىڭ بۇرىنعى پرەزيدەنتى ميحايل گورباچيەۆ تا جاڭا قىرعي قاباق سوعىستىڭ باستالۋ قاۋپىنىڭ تۋىنداۋى جايىندا ايتقان بولاتىن.
«استانا» ارناسى
