رەسەي بانكى قازىرگى قارجىنى تۇراقتاندىرۋ مەحانيزمىنەن باس تارتتى
رەسەي اقشاسىنىڭ قۇلدىراۋىن كۇشپەن ۇستاپ تۇرۋ مۇمكىن بولماي تۇر. ورتالىق بانك 10- قاراشادان باستاپ، رۋبلدى تۇراقتاندىرۋ ماقساتىندا قىرۋار قارجى جۇمسامايدى. تەك قارجى نارىعىندا تۇبەگەيلى وزگەرىستەر ورىن الىپ جاتقان جاعدايدا عانا رەسەيدىڭ ورتالىق بانكى رۋبلدىڭ كۇرت قۇلدىراپ كەتپەۋىنە ارەكەت جاسايدى.
رەسەيدىڭ بانك باسشىلارى مۇنداي شاراعا امالسىزدان بارىپ وتىر. بۇدان ءارى رۋبلدىڭ قۇنىن ۇستاپ تۇرۋ ءۇشىن قىرۋار قاراجات جۇمساۋدىڭ ءتيىمسىز ەكەنىنە كوزدەرى جەتتى. بەيجىڭدە ءوتىپ جاتقان ازيا- تىنىق مۇحيت ەكونوميكالىق بىرلەستىگى سامميتىندە ءسوز سويلەگەن رەسەي پرەزيدەنتى ۆلاديمير پۋتين، جاقىن ارالىقتا رۋبل تۇراقتانىپ، ەكونوميكاعا كەرى اسەرىن تيگىزبەيتىنىن جەتكىزدى.
ۆلاديمير پۋتين، ر ف پرەزيدەنتى:
قازىرگى ۋاقىتتا رۋبلدىڭ قۇنسىزدانۋى جالعاسۋدا. بۇل بىرىنشىدەن، نارىقتا جۇرگەن الىپ- ساتارلاردىڭ ارەكەتى، دەپ ەسەپتەيمىن. ورتالىق بانك جاعدايدى قالىپتى ۇستاۋ ماقساتىندا جۇمىستار اتقارىپ جاتىر. الداعى ۋاقىتتا جاعداي تۇزەلىپ، رۋبل تۇراقتى قالىپقا تۇسەدى دەپ سەنەمىن.
«استانا» ارناسى
