شياڭگاڭدا تاۋەلسىز سايلاۋدى تالاپ ەتۋشىلەر شەرۋگە شىقتى

استانا. قازاقپارات - شياڭگاڭداعى سايلاۋ جۇيەسىنىڭ دەموكراتيزاتسياسى اكسياسىنا قولداۋ كورسەتكەن جۇزدەگەن ادام بەيجىڭمەن تىكەلەي كەلىسسوزدەر جۇرگىزىلۋىن تالاپ ەتىپ، الىپ شاھار ورتالىعىندا شەرۋ جاساپ ءوتتى، - دەپ حابارلايدى ر ي ا نوۆوستي.

شەرۋشىلەر قارجى ورتالىعى اۋدانىنان شياڭگاڭداعى ق ح ر ورتالىق ۇكىمەت وكىلدىگى عيماراتىنا دەيىنگى ايماقتا ساپ تۇزەپ ءوتتى. اكسياعا قاتىسۋشىلاردىڭ كەيبىرى «ءبىز ورتالىق بيلىكپەن كەلىسسوز جۇرگىزىلۋىن تالاپ ەتەمىز» دەگەن ءسوز جازىلعان پلاكاتتارمەن ءجۇردى. اكىمشىلىك عيماراتىنىڭ الدىندا شەرۋشىلەردى پوليتسيا قىزمەتكەرلەرى كۇتىپ تۇردى، شەرۋ بەيبىت اياقتالدى. شەرۋگە قاتىسۋشىلاردىڭ ناقتى سانى بەلگىسىز.

اقپارات كوزىنىڭ ايتۋى بويىنشا، بۇعان دەيىن نارازى توپ وكىلدەرىنىڭ ءبىرى اكىمشىلىك ايماقتىڭ بۇرىنعى باسشىسى دۋن جيانحۋاعا بەيجىڭ تاراپىمەن كەزدەسۋ ۇيىمداستىرىپ بەرۋىن وتىنگەن. نارازى توپ كوشباسشىلارىنىڭ ءبىرى دجوشۋا ۆونگ: «ەگەر شياڭگاڭ بيلىگى دەموكراتيزاتسيالانۋ قوزعالىسىنىڭ وكىلدەرىمەن كەلىسسوز جۇرگىزە الماسا، نەگە ءوزىمىز ورتالىق بيلىكپەن بايلانىسقا ءتۇسىپ، قاراما-قايشىلىقتاردى ازايتپايمىز؟»، - دەدى.

ايتا كەتەيىك، قىركۇيەك ايىنىڭ سوڭىندا نارازى توپ شياڭگاڭنىڭ بيزنەس ورتالىقتارىنا توسقاۋىل قويا وتىرىپ، Occupy Central اكسياسىن باستاعان بولاتىن. ولار بيلىك كەشەنىنە باسا-كوكتەپ كىرىپ، ونداعان ادام قاماۋعا الىنىپ، بىرنەشەۋى جەڭىل جاراقاتتاندى. بيلىك پەن بەلسەندىلەر ءبىر-بىرىنە ءتارتىپ بۇزۋ جانە ارتىق كۇش قولدانۋ ءىسى بويىنشا ايىپ تا تاقتى. بەلسەندىلەر 7 ميلليون تۇرعىنى بار شياڭگاڭدى باسقاراتىن ادامدى قازىرگىدەي ەكى ساتىلى سايلاۋ جۇيەسىمەن ەمەس، تىكەلەي تاڭداۋدى تالاپ ەتىپ وتىر. ماۋسىم ايىندا ولار 800 مىڭ ادام قاتىسقان ون كۇندىك ونلاين-رەفەرەندۋم وتكىزگەن ەدى. ءبىراق بەيجىڭ ونى كۇشى جوق دەپ ەسەپتەدى. قازان ايىنىڭ سوڭىندا شياڭگاڭ اكىمشىلىگى وكىلدەرى مەن شەرۋشىلەر اراسىندا العاشقى كەلىسسوزدەر جۇرگىزىلدى، ءبىراق ول ەش ناتيجە بەرمەدى.

tengrinews.kz