قازاقستاندىقتار جەمقورلىق جايلاعان مەملەكەتتىك ورگانداردى انىقتادى

استانا. قازاقپارات - قازاقستاننىڭ ازاماتتىق اليانسى وتكىزگەن ساۋالناما بارىسىندا جەمقورلىق جايلاعان مەملەكەتتىك ورگاندار انىقتالدى.

بۇگىن استانادا جەمقورلىققا قارسى كۇرەس شارالارىنا قاتىستى دوڭگەلەك ۇستەلدە اتالعان ساۋالنامانىڭ قورىتىندىلارى شىعارىلدى.

قازاقستاننىڭ ازاماتتىق اليانسىنىڭ ديرەكتورى يلدار كاتەنوۆتىڭ اتاپ وتكەنىندەي، ساۋالنامانىڭ نەگىزىندە سۇرالعان ادامداردىڭ 47 پايىزى پوليتسيا قىزمەتكەرلەرى جەمقورلىققا جيى بارادى دەپ كورسەتكەن.

سونىمەن قاتار، ءبىلىم بەرۋ - 31، دەنساۋلىق ساقتاۋ 29 پايىز كورسەتكىشپەن پاراقورلىق ورىستەگەن ورگاندار دەپ تانىلدى.

«بيلىك ورگاندارىنا پارا بەرۋگە تۋرا كەلگەن جاعدايلار بولدى ما؟» دەگەن ساۋالعا ساۋالناماعا قاتىسقان حالىقتىڭ 47 پايىزى «ءيا» دەپ جاۋاپ بەرگەن. ازاماتتاردىڭ 60 پايىزى پارادان كەيىن ماسەلە جىلدام شەشىلگەنىن جەتكىزگەن جانە جەمقورلىق ماسەلەنى شەشۋدىڭ تەز ءارى تيىمدى ءتاسىلى دەپ ەسەپتەيدى»، - دەيدى ي. كاتەنوۆ.

«جەمقورلىقتىڭ باستى سەبەبى نەدە؟» دەگەن سۇراققا ساۋالناماعا قاتىسقانداردىڭ 47 پايىزى مەملەكەتتىك قىزمەتكەرلەردىڭ ارام پيعىلى مەن ساراڭدىعىنان دەسە، 37 پايىزى ادامداردىڭ مەنتاليتەتى سەبەپ دەپ كورسەتكەن. ال 32 پايىزى جەمقورلىق مەملەكەتتىك قىزمەتكەرلەردىڭ كىرىستەرى مەن شىعىستارىن جەتكىلىكتى دەڭگەيدە قاداعالاماۋدان ورىن الادى دەپ ويلايدى.

«سونىڭ ىشىندە تالدىقورعان تۇرعىندارىنىڭ 72,7 پايىزى، كوكشەتاۋ حالقىنىڭ 46 پايىزى جەمقورلىققا قارسى كۇرەستىڭ تيىمدىلىگى تومەن دەپ ەسەپتەيدى»، - دەپ اتاپ ءوتتى ول.

ساۋالناما بارىسىندا جەمقورلىق فاكتىلەرى جيى ۇشىراساتىن وڭىرلەر دە بەلگىلى بولدى.

اتىراۋ، تاراز، الماتى، استانا، تالدىقورعان تۇرعىندارى ءوز وڭىرلەرىندەگى جەمقورلىقتىڭ دەڭگەيىن وتە جوعارى دەپ باعالاپ وتىر.

 اۆتور: جاسۇلان جولدىبايەۆ