قىتايلىق جاستار كونە ءارىپ تاڭبالارىن ۇمىتا باستاعان
انا تىلىندە جاقسى سويلەگەنىمەن، ءيىرىمى كوپ يەروگليفتى قاتە جازاتىن جاستار كوبەيگەن. جاپپاي كومپيۋتەرلەندىرۋدىڭ كەسىرىنەن جاس ۇرپاق ءتىپتى قاراپايىم تاڭبالاردىڭ ماعىناسىن ۇمىتىپ بارادى. ال ءوز قولىمەن كونە جازۋدى اق پاراققا ادەمىلەپ تۇسىرەتىن شەبەرلەردىڭ قاتارى ءتىپتى سيرەپ كەتكەن.
بۇل - «ەڭ ءبىلىمدى جاس» دەگەن تەلەباعدارلاماداعى باسەكە. ايماقتاردان كەلگەن وقۋشىلار ەكى ساعات بويى جانتالاسا قىتاي جازۋىنان ءبىلىم تالاستىرادى. ال باعدارلاما ارقىلى كورەرمەن ءبىلىمىن تەكسەرىپ وتىرادى. سوندىقتان قازىر بەيجىڭدە كونە تاڭبالاردى ۇيرەتەتىن مەكتەپتەر كوپتەپ اشىلا باستادى. وسىدان بەس جىل بۇرىن بۇل مەكەمەلەردە بالالار از بولاتىن، بيلىك كونە جازۋ ماسەلەسىن كوتەرگەلى مۇنداي ءبىلىم وردالارىنا سۇرانىس ارتقان.
دەگەنمەن، جاس بۋىنعا قاراعاندا قىتايلىق قاريالاردىڭ كونە جازۋدى ۇيرەنسەك دەگەن قۇلشىنىسى كۇشتى. بۇل - زەينەتكەرلەر ۋنيۆەرسيتەتى. دەمالىستاعى قارتتارعا تاڭبالاردىڭ قىر- سىرىن ۇيرەتەتىن ارنايى ءدارىس وتكىزىلەدى. ۇستازدارى دا وسال ەمەس. سيامەن ءبىر سۇيكەگەنى بىرنەشە مىڭعا باعالاناتىن بەيجىڭدەگى بەلگىلى كالليگارف حى دا چي ساباق بەرەدى.
كالليگرافتىڭ جۇمىسى ادەمى كارتيناعا پارا- پار، ودان كوز الماي سۇيىنە قاراۋعا بولادى. بوياۋ جاققىش ىشكى جان دۇنيەڭىزگە باعىنۋى كەرەك. ءتىپتى ءار يەروگليفتىڭ ءوز ىرعاعى بار. مۋزىكا سياقتى. قازاقشاعا سۋداي يۋن چاڭ ميڭ كونە تاڭباعا دەگەن ماحابباتىن وسىلاي سۋرەتتەيدى. قازىر جازۋدى سۋمەن جازىپ، ەستە ساقتاۋ قابىلەتىن كۇشەيتىپ العان. مي قارتايماسا، ادام تىڭ بولادى دەيدى.
يۋن چاڭ ميڭ، اۋەسقوي كالليگراف:
- جاتتاپ العاننان كەيىن كىتاپ الماي سول جاتتاعانىم بويىنشا بارىپ جازۋ جازامىن. بۇل ەستە ساقتاۋ قابىلەتىڭدى ەداۋىر كۇشەيتەدى. قازىر مەن اقىن- جازۋشىلاردىڭ كەم دەگەندە بىرەر ءجۇزىن جاتتاي الامىن. ونىڭ جۇمىسى كۇندەلىكتى كۇيبەڭ تىرلىكپەن ءوتىپ جاتقانداردىڭ نازارىن اۋدارتۋ. ءبىر سويلەمدى جازىپ بىتكەنشە العاشقى جازۋلارى كەۋىپ ۇلگەرەدى. وسى ۋاقىت ارالىعىندا قاناتتى سوزدەردى وتكەن- كەتكەندەر وقىپ ۇلگەرۋ كەرەك.
اۆتورلارى: قىتايدان نۇربەك بەكەن، جاڭ ءسۇي
www.24.kz
