ديحان قامزابەك ۇلى: ساكەن جۇنىسوۆكە استانا تورىنەن ەسكەرتكىش قويۋ كەرەك

استانا. قازاقپارات - بەلگىلى قوعام قايراتكەرى، پروزايك، دراماتۋرگ، پۋبليتسيست، ادەبيەت سىنشىسى، مەملەكەتتىك سىيلىقتىڭ يەگەرى ساكەن جۇنىسوۆكە استانا تورىندە ەسكەرتكىش قويۋ كەرەك.

بۇل تۋرالى بۇگىن استانادا وتكەن ساكەن ءجۇنىسوۆ تۋرالى دەرەكتى فيلمنىڭ تۇساۋكەسەرىندە فيلولوگيا عىلىمدارىنىڭ دوكتورى ديحان قامزابەك ۇلى ءمالىم ەتتى.

«ساكەن ءجۇنىسوۆتىڭ قازاق ادەبيەتىنە سىڭىرگەن ەڭبەگى ۇشان تەڭىز. ونىڭ ارتىندا قالعان ەلىمىزدىڭ ماڭىزدى كەزەڭدەرىن بەينەلەگەن سۇبەلى شىعارمالارى - قۇنىن جويمايتىن قۇندىلىقتاردىڭ ءبىرى، حالىق ءومىرىنىڭ كوركەم شەجىرەسى. قايراتكەردىڭ ءوزى ەل-جۇرتىنا كەڭىنەن تانىلعان، حالىقىمىزدىڭ سەرى ازاماتى، قادىرلى ۇلى. ونىڭ قالامىنان شىققان ءاربىر ەڭبەگى ۇنەمى حالىقتىڭ جۇرەگىنە جول تاۋىپ، رۋحاني اسىل قازىناسىنا اينالدى.

ول ادەبيەت شەبەرلەرىنىڭ ىشىندەگى اسا دارىندىلارىنىڭ ءبىرى ەكەنى ءسوزسىز. ساكەن تەك جازۋشى عانا ەمەس، وعان قوسا تانىمال قوعام قايراتكەرى. استانانىڭ ىرگەسىن قالاۋعا دا وزىندىك ۇلەس قوسقان تۇلعالاردىڭ ءبىرى. ءومىرىنىڭ سوڭىنا دەيىن ەلى ءۇشىن ەڭبەك ەتتى. مارقۇمنىڭ سۇيەگى وسى استانادا جاتىر. ەندى ساكەنگە استانا تورىنەن ەسكەرتكىش قويۋ كەرەك»، - دەپ اتاپ ءوتتى ديحان قامزابەك ۇلى.

كۇنسۇلتان وتارباي