00:36, 17 - قازان 2014 | GMT +5
استانادا قوس اققۋ جىلى جاققا ۇشا الماي ءجۇر
استانا. قازاقپارات - استانادا ۇيىرىنەن اداسقان قوس اققۋ ۇشا الماي ءجۇر. باسقالارى تامىزدىڭ اياعىندا جىلى جاققا كەتىپ ۇلگەرسە، بۇل ەكەۋى شالشىق سۋدى ساعالاۋعا ءماجبۇر.
ەسىلدىڭ سول جاعالاۋىنداعى شالشىق سۋدا قوس اققۋدىڭ جۇرگەنىنە ءبىر ايدان اسقان. ۇركيتىنى سونشالىق، ماڭايىنا ەشكىمدى جۋىتپايدى.
دابىل قاققان تۇرعىنداردىڭ ايتۋىنشا، قۇستار جارالى سەكىلدى. سۋ استىنداعى ءشوپ- شالاننان باسقا، ازىق تابا الماعاننان قالجىراي دا باستاعان. حالقىمىز كيەلى سانايتىن قۇس تورەسىنىڭ ومىرىنە الاڭداعاندار، استاناداعى ۆەتەرينارلىق كلينيكالار مەن ورنيتولوگتارعا حابارلاسقان. الايدا ەشبىرى كومەككە كەلمەپتى. قىزىل كىتاپقا ەنگەن قاسيەتتى قۇستارعا دەر كەزىندە كومەك كورسەتىلمەسە، قارا سۋىقتا ءۇسىپ ءولۋى مۇمكىن.
ەگەر جارالى بولسا ۇشىپ كەتۋى ەكىتالاي. مۇمكىن قامىس اراسىندا بالاپانى بار شىعار. سونى ۇشىپ ۇيرەتپەيىنشە كەتە الماي وتىرۋى مۇمكىن. قۇستاردى تاماقتاندىرا بەرۋ كەرەك. قارنى توق بولسا، قىستان امان شىعادى، دەيدى ماماندار.
« KTK»
