قازاقستاندا تۋريزم، مەيرامحانا جانە مەيمانحانا ءىسى بويىنشا قوس ديپلومدى ماماندار دايارلاناتىن بولدى

الماتى. قازاقپارات - قازاقستاندا تۋريزم، مەيرامحانا جانە مەيمانحانا ءىسى بويىنشا قوس ديپلومدى ماماندار دايارلاناتىن بولادى. بۇل تۋرالى كەشە الماتىدا وتكەن «تۋريزم، مەيرامحانا جانە مەيمانحانا يندۋسترياسى سالالارىندا كاسىبي ءبىلىم بەرۋ اتتى» حالىقارالىق عىلىمي كونفەرەنسيا بارىسىندا الماتى تەحنولوگيالىق ۋنيۆەرسيتەتىنىڭ ءبىرىنشى پروەكتورى، تەحنيكا عىلىمدارىنىڭ دوكتورى، پروفەسسور باۋىرجان نۇراحمەتوۆ ايتتى.

ونىڭ ايتۋىنشا، قازىرگى تاڭدا وسى سالالاردا قازاقستان ءۇشىن كاسىبي بىلىكتىلىگى جوعارى مامان دايارلاۋ - ەڭ وزەكتى ماسەلەلەردىڭ بىرىنە اينالعان.

«قازاقستان ءوز دامۋىندا جاڭا ساتىعا كوتەرىلدى. ەلىمىزدە ءىرى-ءىرى حالىقارلىق شارالار وتۋدە. 2017-جىلى استانادا «XPOE-2017» حالىقارالىق كورمەسى، الماتىدا قىسقى ۋنيۆەرسيادا ويىندارى جانە باسقا دا ماڭىزدى شارالار وتكىزىلەدى. وعان الىس-جاقىن شەتەلدەردەن سان مىڭداعان تۋريستەر، ماماندار كەلەدى. وسى تۇرعىدا تۋريزم، مەيرامحانا جانە مەيمانحانا ءىسى سالالارىنىڭ بىلىكتى ماماندارىنا دەگەن سۇرانىس ارتا تۇسەدى. سوندىقتان بۇگىنگى باس قوسۋدا اتالمىش سالالاردا ماماندار دايارلاۋ ماسەلەلەرى، وقۋ جۇيەسىنىڭ باعىتتارى جان-جاقتى تالقىلانادى»، - دەدى ءوز سوزىندە ب. نۇراحمەتوۆ.

ونىڭ ايتۋىنشا، قازىرگى تاڭدا بۇل سالادا ەلىمىزدە مەملەكەتتىك دەڭگەيدە تىڭ جوبالار قولعا الىنا باستاعان.

«بيىل مىسالى، تۋريزم، مەيرامحانا جانە مەيمانحانا بيزنەسى سالالارى بويىنشا قازاقستاندا تۇڭعىش رەت قوس ديپلومدى ماماندار دايارلاۋ جوباسى ق ر ءبىلىم جانە عىلىم مينيسترلىگىنىڭ بەكىتۋى بويىنشا الماتى تەحنولوگيالىق ۋنيۆەرسيتەتىنىڭ بازاسىندا جۇزەگە اسىرىلا باستادى. ويتكەنى بۇل جوعارى وقۋ ورنى مەيرامحانا ءىسى مەن مەيمانحانا بيزنەسى ماماندىقتارىن 2009-جىلى قازاقستاندا تۇڭعىش رەت ماماندىقتار كلاسسيفيكاتسياسىنا ەنگىزگەن بولاتىن. بيىل وسى جاڭا قوس ديپلومدىق باعدارلاماسى بويىنشا 20 تالاپكەر وقۋعا قابىلداندى. دارىستەردى تەك اعىلشىن تىلىندە ەكىجاقتى كەلىسىم-شارت نەگىزىندە شۆەيتساريانىڭ اتاقتى تۋريزم جانە قوناق ءۇي مەنەدجمەنتى ينستيتۋتىنىڭ وقىتۋشىلارى جۇرگىزەدى. وقۋدى بىتىرگەن تۇلەكتەر وسى ينستيتۋتتىڭ ديپلومى مەن الماتى تەحنولوگيالىق ۋنيۆەرسيتەتىنىڭ مەملەكەتتىك ۇلگىدەگى ديپلومىنا يە بولادى»، - دەدى ب. نۇراحمەتوۆ.

وقۋ اقىسى ءبىرىنشى جىلعا - 450 مىڭ تەڭگە، ال قالعان جىلدارعا - 650 مىڭ تەڭگە كولەمىندە بەلگىلەنگەن. سونىمەن قاتار اتالمىش جوعارى وقۋ ورنى قابىرعاسىندا ەلىمىزدىڭ مەيرامحانالارى مەن مەيمانحانالارىندا تالاي جىلدان بەرى ەڭبەك ەتىپ كەلە جاتقان، ءبىراق ارنايى ءبىلىمى جوق مەنەدجەرلەردىڭ بىلىكتىلىگىن ارتتىرۋ ماقساتىندا مەملەكەتتىك دەڭگەيدە ءۇش جانە التى ايلىق وقىتۋ كۋرستارىن ۇيىمداستىرۋ كوزدەلۋدە.

بۇگىنگى باس قوسۋعا الماتى قالاسى اكىمدىگىنىڭ تۋريزم باسقارماسىنىڭ ءتوراعاسى باقىتجان جولامانوۆ، شۆەيتساريانىڭ تۋريزم جانە قوناق ءۇي مەنەدجەمەنتى ينستيتۋتىنىڭ ديرەكتورى Rohit Bhatia, «ەكى استانا» حالىقارالىق بىرلەستىگى (سانكت-پەتەربور، رەسەي)، الماتى قالاسىنىڭ جەتەكشى تۋريستىك اگەنتتىكتەرى، قوناق ۇيلەر مەن مەيرامحانالارىنىڭ جەتەكشىلەرى قاتىستى.

اۆتور: جاپپاربەرگەن ايبوتا