قىران قۇستاردى شەتەلگە ساتۋ قازاقتىڭ رۋحىن ساتقانمەن تەڭ - قۇسبەگى ءابىلحاق تۇرلىبايەۆ

الماتى. قازاقپارات - قازاقتىڭ قىران قۇستارىن شەتەلگە ساتۋ قازاقتىڭ رۋحىن ساتقانمەن تەڭ.

بۇل تۋرالى بۇگىن الماتىدا «بۇركىتشى» فەدەراتسياسى مەن مەملەكەتتىك ورگانداردىڭ اراسىندا قىران قۇستاردى قورعاۋ بويىنشا بايلانىس ورناتۋ» دوڭگەلەك ۇستەلى بارىسىندا ەلىمىزگە بەلگىلى قۇسبەگى ءابىلحاق تۇرلىبايەۆ ءمالىم ەتتى.

ونىڭ ايتۋىنشا، قۇسبەگىلىك ونەردىڭ وتانى - ورتالىق ازيا ايماعى جانە ول قازاقتىڭ ءتول ونەرى.

«قازىر ەلىمىزدە وكىنىشكە قاراي بۇركىت، سۇڭقار، يتەلگى سەكىلدى قىران قۇستار تىم ازايىپ بارادى. ولار شەتەلدەرگە، اسىرەسە، اراب ەلدەرىنە 1000-2000 دوللارعا ساتىلىپ كەتىپ جاتىر. بۇل رۋحتى ساتقانمەن بىردەي. اتا- بابامىز ولاردى ورلىكتىڭ، ەرلىكتىڭ، كورەگەندىكتىڭ سيمۆولى رەتىندە باعالاپ، قۇرمەتتەگەن. قىران قۇستار دا ءوز الدىنا ءبىر دۇنيە. ولاردى باعالاماعاندار قادىرىن دە بىلمەيدى، قۇسبەگى بولىپ تا جارىتپايدى»، - دەدى ءابىلحاق اقساقال.

قۇسبەگىلىكپەن اينالىسقانىنا 40 جىلدان اسقان، بيىل 74 جاسقا اياق باسقان تارباعاتاي ءوڭىرىنىڭ تۋماسى ءابىلحاق اقساقال ەلىمىزدە قۇسبەگىلەردىڭ قولىندا بارى- جوعى 122 جىرتقىش قۇستىڭ بار ەكەندىگىن جەتكىزدى. ال كورشى موڭعوليانىڭ وزىندە جەكە قولدا مۇنداي 400 قۇس بار ەكەن.

 دەگەنمەن، «جىرتقىش قۇستار از بولعانىمەن، قۇسبەگىلىك ونەردى جاقسى مەڭگەرگەندەر ودان كوپ»، دەيدى اقساقال. بۇل دا بولسا كوڭىلگە دەمەۋ.

ايتا كەتەلىك، ق ر ۇلتتىق سپورت تۇرلەرى قاۋىمداستىعىنىڭ دەرەكتەرى بويىنشا بۇگىندە ەل ىشىندە قۇسبەگىلەردىڭ قولىندا 122 عانا جىرتقىش قۇس بار. ولاردىڭ 99 ى - بۇركىت، 18- ءى - قارشىعا، تورتەۋى - يتەلگى، بىرەۋى - سۇڭقار. وسى قۇستاردىڭ 69 ىندا (56 بۇركىت، 13 سۇڭقار) ەشقانداي قۇجات جوق ەكەن. سوندىقتان ق ر ۇلتتىق سپورت تۇرلەرى قاۋىمداستىعى تاراپىنان قىران قۇستاردى قۇجاتتاندىرۋ بويىنشا قازاقستاننىڭ «اڭشىلار مەن اڭشىلىق سۋبەكتىلەر قوعامدىق بىرلەستىگى قاۋىمداستىعىنا» ءوتىنىش جاسالىپتى. قازىر بۇل جۇمىس وسى قاۋىمداستىقتىڭ باسقارما ءتوراعاسى ورالباي ابدىكارىم ۇلىنىڭ تىكەلەي اتسالىسۋىمەن جۇزەگە اسىپ جاتقان كورىنەدى.

اۆتور: جاپپاربەرگەن ايبوتا