بۇگىن قازاقستان چەحيانى جەڭە الا ما؟
ەكى قۇرامانىڭ وسىعان دەيىن جولدارى تۇيىسپەگەن. ال كلۋبتىق دەڭگەيدە كوماندالارىمىز التى رەت جولىققان. بۇل ويىندار ناتيجەسىندە چەح كوماندالارى جەرلەستەرىمىزدى 3 ويىندا جەڭىپ، 2 ويىندا تەڭ ءتۇسىپ، 1 ويىندا جەڭىلگەن ەكەن. سوڭعى ويىن 2012/2013-جىلعى ماۋسىمدا قاراعاندىلىق «شاحتەر» مەن ليبەرەتستىك «سلوۆان» كوماندالارى اراسىندا وتكەن.
باسپا ءسوز ءماسليحاتىندا ۇلتتىق قۇراما باپكەرى يۋري كراسنوجان جەڭىسكە جەتۋدىڭ جولى جوق ەمەس ەكەنىن باسا ايتتى. سونىمەن قاتار، قۇراما ساپىندا دا وزگەرىستەر ورىن الۋى مۇمكىن. ويتكەنى، باس باپكەر نيدەرلاندىعا قارسى كەزدەسۋگە بىرنەشە ويىنشىلارىمىزدى الىپ بارماعان بولاتىن. ال چەحتاردىڭ باس باپكەرى پاۆەل برۆا دا بۇل جاعدايدان حاباردار بولىپ شىقتى.
چەحيا قۇراماسى قازىرگى تاڭدا فيفا رەيتينگىنىڭ 28- ساتىسىنا جايعاسقان. ال نيدەرلاندى بولسا 4- ورىندا بولاتىن. بۇگىن ءوز الاڭىمىزدا وينايتىن ۇلتتىق قۇرامادان ۇلكەن ءۇمىت كۇتۋگە بولادى. نەگىزگى قۇرامدا شىعاتىن ويىنشىلار ءتۇس اۋا بەلگىلى بولماق. ال ق ف ف مالىمەتى بويىنشا، جاراقاتىنا بايلانىستى ۆيكتور دميترەنكو مەن «امستەردام-ارەنادا» قىزىل قاعاز العان باۋىرجان جولشيەۆتىڭ ورنىنا جارتىلاي قورعاۋشى اسلان دارابايەۆ پەن الەكساندر كيروۆ شاقىرتۋ الدى.
قوناقتاردىڭ فاۆوريت ەكەنى راس. ءبىراق، قازاقستان قۇراماسى توسىن سىي جاسايدى دەگەن ءۇمىتىمىز باسىم. بۋكمەكەرلىك ورتالىقتار وتانداستارىمىزدىڭ جەڭىسىنە 7,1 كوەففيتسيەنت، تەڭ ويىنعا 4,05 كوەففيتسيەنت، قوناقتار جەڭىسىنە 1,46 كوەففيتسيەنت ۇسىنۋدا. ناقتى ناتيجەلەر بويىنشا قوناقتار ءبىر دوپ باسىمدىعىمەن جەڭۋى مۇمكىن دەگەن بولجامدار كوبىرەك ايتىلۋدا.
ايتا كەتەيىك، قازاقستان مەن چەحيا قۇرامالارى اراسىنداعى كەزدەسۋ بۇگىن وتەدى. ويىن استانا ۋاقىتىمەن 22:00-دە باستالادى. تىكەلەي ەفيردە «قازاقستان» جانە «KazSport» ارنالارىنان تاماشالاي الاسىزدار.
اۆتور: ومىربەك سانسىزباي
massaget.kz
