قازاق تاريحىنا قاتىستى قۇندى دەرەكتەر ۇلى بريتانيادان تابىلۋدا

استانا. قازاقپارات - ەل تاريحشىلارى قازىر ەۋروپادا تىڭعىلىقتى زەرتتەۋلەر جۇرگىزۋدە. ناتيجەلەرى ارنايى كورمەلەردە جاريالانادى.

جادىگەرلەر قازاقستاننىڭ قاتپار-قاتپار تاريحىنان سىر شەرتەدى.

ءبىر قىزىعى، جادىگەرلەر تۇركيا، قىتاي، ءۇندىستان، ەۋروپا ەلدەرىنەن تابىلعان بولاتىن. جەرگىلىكتى تاريحشىلار قازىر ولارعا تىڭعىلىقتى زەرتتەۋ جۇرگىزىپ جاتىر.

ال ارنايى ماماندار ءتۇرلى كورمەلەرگە اپارىپ، تورتكۇل دۇنيە نازارىنا ۇسىنۋدا.

ۋرسۋلا ۋيليامس،  ۇلى بريتانيا كىتاپحاناسىنىڭ قىزمەتكەرى:

- بۇل جەردەگى جادىگەرلەر قازاق ەلىمەن جاقىن تانىسۋعا مۇمكىندىك بەرەدى. اسىرەسە،  ۇلى بريتانيا كىتاپحاناسىنداعى اقپاراتتارعا عالىمداردىڭ نازارى اۋدى. سەبەبى، ءدال وسى جەردە ورتا ازيانىڭ وتكەنىنە قاتىستى قۇندى دەرەكتەر ساقتالعان.

ال قازاقستاندىق عالىم مەرۋەرت ابۋسەيىتوۆانىڭ ايتۋىنشا، بۇل جادىگەرلەر شىعىس پەن باستىستىڭ قانداي تىعىز بايلانىستا بولعاندىعىن بىلدىرەدى. وسى سالاعا جاقىن جاندار بۇل جولى لوندون قالاسىنداعى قازاقستان بەيتىتشىلىك پەن كەلىسىم ورتالىعىنا جينالدى. بىلىكتىلىكتەرىمەن ءبولىسىپ، شەبەرلىكتەرىن شىڭدادى.

مەرۋەرت ابۋسەيىتوۆا، تاريحشى:

- بۇل جەردە وتە بەدەلدى تاريحي مەكتەپتەر باس قوسقان بولاتىن. ولار ءوزارا تاجىريبە الماسىپ، تاريحي قۇندىلىقتاردى كەڭىنەن ناسيحاتتاۋ جونىندە كەلىسىمگە كەلدى.

جەرگىلىكتى جازۋشى جانە جۋرناليست نيك فيلدينگ قازاقستان وڭىرىنە بۇرىننان بەرى قىزىعىپ ءجۇر. ءتىپتى، وسى تاقىرىپتا تالاي عىلىمي جۇمىستار جازىپ تاستاعان. ال قازىر  ⅩⅨ عاسىردا قازاق ەلىنە كەلگەن ۇلى بريتانيالىق ساياحاتشى توماس اتكينسون زەرتتەۋلەرىن زەردەلەۋدە.

نيك فيلدينگ،  ۇلى بريتانيا جازۋشىسى:

- اتكينسون قازاق ەلىن كوپ ارالاعان. اسىرەسە، الاتاۋ، اراسان، اقسۋ سياقتى ايماقتارعا بارعانداعى جازبالارىن ەرەكشە دەپ ايتا الامىن. ءتىپتى، ونىڭ ۇلى دا قازاقستان دالاسىندا تۋىلدى.

قازاقستاندىق تاريحشىلار ەندى  ۇلى بريتانيانىڭ گەوگرافيالىق قوعامىمەن بىرىگە وتىرىپ، ءتۇرلى سەمينارلار وتكىزبەك. بۇل جيىنداردا قوس ەلدىڭ تاريحىنا قاتىستى قۇندى دەرەكتەر كەڭىنەن تالقىلاناتىن بولادى.

اۆتورلارى: اسلان قاجەنوۆ، بەلا قۇدايبەرگەنوۆا

24.kz