حالىقارالىق وليمپيادا كوميتەتىنىڭ پرەزيدەنتى قازاقتىڭ قارادومالاعىنىڭ تۇساۋىن كەستى

استانا. قازاقپارات - حالىقارالىق وليمپيادا كوميتەتىنىڭ پرەزيدەنتى توماس باح الماتىعا كەلگەن ساپارىندا قازاقتىڭ ۇلتتىق سالت-داستۇرىنە ساي، ءبىر قارادومالاعىمىزدىڭ تۇساۋىن كەستى، دەپ حابارلايدى "الاش ايناسى".

كەشە حالىقارالىق وليمپيادا كوميتەتىنىڭ پرەزيدەنتى توماس باحتىڭ الماتىعا كەلۋ ساپارىنا وراي، وتاندىق ب ا ق وكىلدەرى مەن سپورتشىلارعا ارنالعان باسپا ءسوز جيىنىن وتكەنىن جازعانبىز.

اتالعان باسپا ءسوز جيىنىنىڭ باسىندا لاۋازىمدى تۇلعالار قىسقاشا عانا ءسوز سويلەپ، ودان سوڭ "سۇراق - جاۋاپ" جۇيەسىندە جالعاستى. راس، كوپ سۇراق قويىلعان جوق. ويتكەنى ح و ك پرەزيدەنتى توماس باح پەن ونىڭ جانىنداعى دەلەگاتسيا وكىلدەرى كەرى ۇشاتىن بولعاندىقتان، اسىعىس ەدى.

ەڭ سوڭىنان سۇراق قويعان قازاقستان سپورت باسىلىمدارى قاۋىمداستىعىنىڭ پرەزيدەنتى ءىلياس وماروۆ بولدى. ول ءبىرىنشى كەزەكتە:

- توماس مىرزا، ءوزىڭىز ايتقانداي، كەيىنگى جىلدارى ءبىزدىڭ سپورتشىلار جوعارى ناتيجە كورسەتىپ جۇرگەنىمەن، وليمپيادا ويىندارىنا رەسمي تۇردە تىركەلەتىن سپورتتىق جۋرناليستەرىمىزدىڭ سانى تىم از. بار بولعانى - ءۇش جۋرناليست، ءبىر فوتو ءتىلشى. بۇل قازاقستان سەكىلدى سپورتشىلارىنىڭ دەلەگاتسياسى اسا اۋقىمدى، الەۋەتى زور مەملەكەت ءۇشىن وتە از سەكىلدى. ءبىز وسىنى قۇزىرلى ۇيىمدارعا ءجيى-ءجيى ايتىپ ءجۇرمىز.

ازىرشە ناتيجە بولماي تۇر. ەندى تىكەلەي وزىڭىزگە جۇگىنىپ وتىرمىز. ح و ك قىسقى جانە جازعى وليمپيادا ويىندارىنان قازاقستانعا تىكەلەي اقپارات تاراتاتىن جۋرناليستەر سانىن كوبەيتۋگە كومەكتەسسە ەكەن دەيمىز، - دەپ ماڭىزدى ماسەلەنى كوتەردى.

سول كەزدە توماس باح كومەكشىلەرىنىڭ بىرەۋىن ورنىنان تۇرعىزىپ، "ءسىزدىڭ بۇل ءوتىنىشىڭىز اياقسىز قالمايدى دەپ ويلايمىن، وسى ماسەلەگە جاۋاپتى لاۋازىمدى ادامدار تىكەلەي وزدەرى اينالىساتىن بولادى"، - دەپ الگى ادامدى نۇسقادى.

ورتاعا كىشكەنتاي بالاسىن كوتەرىپ شىققان ءىلياس وماروۆ بۇل سۇراعىمەن شەكتەلگەن جوق.

- ەكىنشى ساۋالىمدى سۇراق دەگەننەن گورى ءوتىنىش دەسەك دۇرىس بولار. مىنە، مەنىڭ قولىمدا بالام تۇر. بۇل كىشكەنتاي ءسابي ءسىزدى كورۋ ءۇشىن سوناۋ استانادان، مىڭ شاقىرىمنان استام جەردەن كەلدى. قازاقتا "تۇساۋ كەسۋ" دەگەن، اتا-بالالارىمىزان ميراس بولىپ كەلە جاتقان ءداستۇر بار. قارسى بولماساڭىز، بالامنىڭ تۇساۋىن ءوز قولىڭىزبەن كەسىپ بەرۋىڭىزدى سۇرايمىن، - دەدى.

وتىرعانداردىڭ ءبارى ءىلياسقا ريزا بولدى دا، جىميا كۇلدى دە، "قالاي عانا وسىنداي وي باسىنا كەلە قالدى ەكەن" دەپ تاڭدانىستى دا.

ال توماس باح " نە دەيدى، تۇساۋ كەسۋ دەگەن نەمەنە..." دەپ تاڭدانعان جوق. ءتىپتى ويلانباستان:

- ارينە، كەسەمىن. سىزگە راحمەت، وسىنداي قۇرمەت كورسەتىپ وتىرعان. ال ءسىزدىڭ بالاڭىزبەن ءالى تالاي كەزدەسەمىز دەپ ويلايمىن. سوندا وسى، ەڭ العاشقى كەزدەسۋدى راحاتتانا كۇلە وتىرىپ، ەسىمىزگە الاتىن بولامىز، - دەپ ءماز بولدى.

وسىلاي، ح و ك پرەزيدەنتى، سەمسەرلەسۋ سپورتىنان وليمپيادا چەمپيونى (مونرەال-1976) جانە الەم چەمپيونى (1977 - جىل) توماس باح قازاقتىڭ قارادومالاعىنىڭ تۇساۋىن كەستى.

ءىلياس ۇيىنەن ءبارىن دە دايىنداپ اكەلىپتى. ءبىردان قورجىنىن اشىپ جىبەرىپ، ىشىنەن كىشكەنە عانا كىلەم، قايشى، تاسپا، ءبارىن-ءبارىن الىپ شىقتى. ونىڭ ءبىر جاس ءۇش ايلىق بالاسىنىڭ اياعىنا بايلانعان تۇساۋدى قالاي كەسۋ كەرەك ەكەندىگىن توماس باحقا ق ر ۇلتتىق وليمپيادا كوميتەتىنىڭ پرەزيدەنتى تەمىرحان دوسمۇحامبەتوۆ كورسەتىپ تۇردى. ال ح و ك پرەزيدەنتى كىشكەنتاي ءالتايىر وماروۆتىڭ تۇساۋىن كەستى. ءارى اكەسى ءىلياسقا ەستەلىك رەتىندە سىيلىق تابىس ەتتى. ءىلياس تا ح و ك پرەزيدەنتىن قۇر قول قايتارماي، ءوزى دايىنداپ اكەلگەن ەستەلىك سىيلىعىن تابىستادى.

اۆتور: نۇرعازى ساسايەۆ