ۋكراينا قورعانىس ءمينيسترى گەلەتەي وتستاۆكاعا كەتتى

استانا. قازاقپارات - ۋكراينا پرەزيدەنتى پەتر پوروشەنكو ەلدىڭ قورعانىس ءمينيسترى ۆالەري گەلەتەيدى وتستاۆكاعا جىبەردى. بۇل تۋرالى جەكسەنبى كۇنى كەشكە ۋكراين پرەزيدەنتىنىڭ باسپا ءسوز قىزمەتى حابارلادى.

«ۋكراينا پرەزيدەنتى پەتر پوروشەنكو قورعانىس ءمينيسترى ۆالەري گەلەتەيدىڭ وتستاۆكاعا كەتەتىندىگى تۋرالى جازعان راپورتىن قولداپ قول قويدى. پرەزيدەنت اسكەري ۆەدومستۆو باسشىلىعىن اۋىستىراتىن ۋاقىت كەلگەنىن ايتتى»، - دەلىنگەن حابارلامادا.

باسپا ءسوز قىزمەتىنىڭ حابارلاۋىنشا، بۇگىن، 13- قازاندا ۋكراينا پرەزيدەنتى جاڭا قورعانىس ءمينيسترىن تانىستىرادى. سونىمەن بىرگە، پوروشەنكو 14- قازان كۇنى جوعارعى رادا جاڭا كانديداتۋرانى قولدايتىنىنا ۇمىتتەنەتىنىن جەتكىزدى. «جاڭا ءمينيستردىڭ كانديداتۋراسىنا داۋىس بەرۋدە ۋاقىت سوزبايتىنىمىزعا كۇمانىم جوق. ءدال سەيسەنبى كۇنى بولادى دەپ سەنەمىن»، - دەدى ول.

پوروشەنكونىڭ ايتۋىنشا، گەلەتەيدىڭ وتستاۆكاسى مەن باسقا دا كادرلىق وزگەرىستەر، ناقتى ايتقاندا، مەملەكەتتىك شەكارا قىزمەتى باسشىلىعىنىڭ بوساتىلىپ، بارلاۋ بويىنشا كوميتەتتىڭ قۇرىلۋى جانە ونىڭ ءتوراعاسى بولىپ يگور سمەشكونىڭ تاعايىندالۋى «كۇش قۇرىلىمدارىن كۇشەيتەدى جانە ۋكراينانىڭ قورعانىس قابىلەتىن بەكىتەدى».

بۇعان دەيىن، 6- قازاندا پەتر پوروشەنكو مەملەكەتتىك شەكارا قىزمەتى باسشىسى نيكولاي ليتۆيندى جانە ونىڭ ءبىرىنشى ورىنباسارى پاۆل شيشوليندى قىزمەتتەن بوساتقان ەدى.

ۆالەري گەلەتەي قورعانىس ءمينيسترى لاۋازىمىنا وسى جىلدىڭ 3- شىلدەسىندە تاعايىندالعان. اسكەري ۆەدومستۆونى باسقارعان كەزىندە رەسەيدىڭ دە، ۋكراينانىڭ دا سىنىنا ۇشىرامادى. ۋكراينا ىشكى ىستەر ءمينيسترى ارسەن اۆاكوۆتىڭ كەڭەسشىسى انتون گەراشەنكو گەلەتەيدىڭ قىزمەتى مەن رەسەيدىڭ يادرولىق قارۋ قولدانۋ تۋرالى مالىمدەمەسى ۋكراين ارمياسىن بۇكىل الەمگە مازاق قىلدى دەدى.

پوروشەنكو جەكسەنبى كۇنى دونباسستاعى شيەلەنىستى جاقىن ۋاقىتتا تولىق توقتاتۋعا قول جەتكىزەتىنىنە سەنەتىنىن مالىمدەدى. «بۇل جاعداي بولعان سوڭ، بۋفەرلىك ايماق قۇرۋ باستالادى. ەكى تاراپ تا اۋىر قارۋ-جاراقتاردى كەم دەگەندە باقىلاۋداعى ايماق تۇكپىرىنە 15 شاقىرىم جەرگە اكەتۋى ءتيىس»، - دەلىنگەن ۋكراينا پرەزيدەنتىنىڭ سايتتا جاريالانعان ۇندەۋىندە.

پوروشەنكونىڭ ايتۋىنشا، ۋكراين بيلىگى قازىر ەلدىڭ شىعىسىنداعى ارنايى وپەراتسيالارعا جۇمىلعان اسكەردىڭ قىس مەرزىمىنە دايىندىق جاساۋىنا قادالا كوڭىل اۋدارىپ وتىر. «اسكەرىمىزدىڭ ورنالاسقان جەرىنەن كەيىن قايتۋى تۋرالى ءسوزدىڭ بولۋى دا مۇمكىن ەمەس»، - دەپ مالىمدەدى ول.

ۋكراينا پرەزيدەنتى تۇتقىننان مىڭ جارىمعا جۋىق ۋكراين اسكەرىنىڭ بوساتىلعانىن دا قوسىپ ايتتى: «قازىردىڭ وزىندە لاڭكەستەردىڭ تۇتقىنىندا بولعان مىڭ جارىمعا جۋىق ادامىمىزدى بوساتىپ الا الدىق».

Tengrinews.kz