ۇيلەنۋىمە كرەديت كەدەرگى بولدى

استانا. قازاقپارات - بۇگىندە ەكىنىڭ ءبىرىنىڭ موينىندا جۇرگەن كرەديت قارىزىنىڭ قۇرساۋىنا تۇسپەۋگە بارىنشا تىرىسىپ ءجۇر ەدىم.

جوعارى وقۋ ورنىن بىتىرگەن سوڭ، الماتىنىڭ جانىنداعى ءبىر اۋىلدا تۇراتىن اكە-شەشەمنىڭ جايى ويلاندىرىپ، كوپ كۇتتىرمەي ۇيلەنۋ دە ويىمدا جۇرگەن-تۇعىن.

وتكەن جىلى جاقىن دوسىم امىربەك «نەكسيا» اۆتوكولىگىن ساتىپ العاننان-اق كوڭىلىم نىلدەي بۇزىلدى. كولىك الىپ كوڭىلى جايلانعان دوسىم دا بۇرىنعىداي ەمەس، قىزدارعا ەركىن قىرىنداپ، كورىكتى قىزداردىڭ كوزىنە ءجيى تۇسە باستادى.

ارينە، قالانىڭ قۋ قىزدارىنا ونىڭ ءوزىنىڭ لىپىلداعان ارەكەتى ەمەس، ماشيناسىنا جايعاسىپ، سەرۋەندەگەن كوبىرەك ۇنايتىنىن ىشتەي سەزەتىنمىن. سول سەبەپتەن دە امىربەكتىڭ قاسىندا ءوزىمدى قوراش سەزىنىپ، ىشتەي «قايتسەم دە كولىك الىپ، ونى باسىپ وزامىن. ونىڭ اينالاسىندا ۇيىرىلگەن قىزداردىڭ نازارىن وزىمە اۋدارامىن» دەگەن باسەكە پايدا بولدى. ءبىراق، اكە- شەشەسى كۇيلى- قۋاتتى، ءوزى جاقسى جالاقىدا جۇمىس ىستەپ جۇرگەن امىربەكپەن ءوزىمدى سالىستىرۋ ويىما دا كەلمەپتى جانە وعان مۇرشام دا جوق ەدى.

سونىمەن ۇيدەگى اكە-شەشەمە ايتپاي، اپكەمدى كوندىرىپ، جەزدەم دە ايتپاۋعا ۋادە بەرىپ ء(وزىم ءبىر جىلدا تولەپ تاستايتىن ىڭعايىم بارىن ايتىپ سەندىرگەن سوڭ) كرەديتكە اقشا الىپ، سوعان ءبىراز عانا جۇرىلگەن قىزىل ءتۇستى «مەرس-600» ساتىپ الدىم. دەگەنمەن، مۇندايدا جاسىرىپ قالاي وتىرا الارسىڭ، كولىگىمدى كورسەتىپ اكە- شەشەمە بارىپ قايتتىم. انام بايعۇستا ەس قالعان جوق، مارە-سارە، ءماز-ءمايرام. ال زەينەتكەر اكەم قاشان دا بايسالدى قالپىن ساقتاپ «بۇل نە قىلعان باتپانقۇيرىق» ەكەندىگىن تاپتىشتەي سۇرادى.

زاۆودتا ينجەنەر بولىپ ىستەيتىن مەنىڭ جالاقىم 150 مىڭ شاماسىندا ەكەنىن، ال ماشينانىڭ كرەديتىن اي سايىن 75 مىڭنان تولەيتىندىگىمدى ەستىگەندە بىردەن اشۋلاندى. رۇقساتسىز، ەش اقىلداسپاي الا سالعانىما كەيىدى دە. بولار ءىس بولدى، قايتەمىز ەندى... اكە بولعاننان كەيىن دە سىن-ەسكەرتپەسى قاشان دا ورىندى عوي، ءۇنسىز قۇتىلدىم.

ءسويتىپ وتكەن جىلى ساتىپ العان ماشينام العاشىندا جامان بولعان جوق. بۇرىن ءسوز سالعانىمدا سىرعاقتاپ جۇرەتىن ساۋلەمەن دە ءسوزىم جاراسىپ، ۇيلەنەتىن ۋاقىتتى بيىلعا بەلگىلەپ كادىمگىدەي جۇرە باستادىق. ءسويتىپ جۇرگەندە كۇتپەگەن جەردەن قارا باستى... الماتىنىڭ يۋ-قيۋ كوشەلەرىنىڭ بىرىندە اعىزىپ كەلە جاتىپ... تىزگىنگە يە بولا الماي، باعدارشام قيىلىسىندا ءبىر «دجيپتى» بۇيىردەن كەلىپ ءبىر-اق سوقتىم.

ابىروي بولعاندا، كولىگىمنىڭ الدى تالقان بولعانىمەن، وزىمە ايتارلىقتاي زالال كەلگەن جوق. ءبىراق، بىردەن جەتكەن جول پوليتسياسى وقيعاعا كىنالى مەن ەكەندىگىمدى تەز انىقتادى. وسىلايشا اياق استىنان ءبۇيىرى مايىسقان «دجيپتىڭ» يەسىنە ءبىر، جولدا ءجۇرۋ ەرەجەسىن بۇزعانىم ءۇشىن ەكى، ءارى جۇرۋدەن قالعان كولىگىمى ءۇشىن كرەديتتى ءۇش تولەيتىن بولىپ قازىرگى تىلمەن ايتقاندا «كوسياكقا» ءبىر-اق كىردىم.

سودان بەرى كوكتەم ءوتتى، جاز ءوتتى... بۇگىندە مەن تىرشىلىگىمنىڭ ءمانى كەتكەن بىرەۋگە اينالدىم. «قىرسىق ءبىر اينالدىرسا شىر اينالدىرادى» دەگەن راس ەكەن، جاقىندا قىسقارتۋ ءجۇرىپ زاۋىت باسشىلىعى قىسقارتىلعان قىزمەتكەرلەردىڭ ىشىنە مەنى دە قوسىپ جۇمىستان شىعاردى دا تاستادى. ال، مىنە، ساعان ماشينا، مىنە ساعان ۇيلەنۋ... ساۋلەگە بارار بەتىم جوق، كەزدەسۋ-حابارلاسۋ جايىنا قالعان. قوڭىراۋ شالسا، ءارتۇرلى سىلتاۋ ايتىپ سىرعىتىپ كەلەمىن. ول باسىمداعى وسىناۋ جاعدايلاردىڭ ءبىرىن دە بىلمەيدى. اكە- شەشەم دە ازىرگە بەيحابار. قازىرشە كرەديتتى جەزدەم تولەپ كەلە جاتىر. وعان دا وڭاي ەمەس. جاعدايدى ەستيتىن بولسا، اكەمنىڭ ايامايتىنى وزىمە ايان. «شاقشاداي باسىم شاراداي بولدى» دەگەن وسى شىعار. نە ىستەسەم بولادى، اعايىن؟.. اقىل بەرىڭىزدەرشى ماعان...

اۆتور: قايناربەك قايسار ۇلى، استانا قالاسى