ەرتىس وزەنىندە تەڭىز جاندىگى پايدا بولدى

استانا. قازاقپارات - ەرتىس وزەنىنەن دەنەسى ىركىلدەگەن ءمولدىر ءتۇستى تەڭىز جاندىگىن العاش بولىپ بالىقشىلار بايقاعان.

ماماندار وكتيابر سۋ توعانىندا تەڭىزدە تىرشىلىك ەتەتىن جاندىكتىڭ پايدا بولعانىن راستاپ وتىر، دەپ جازادى 24.kz.

وسكەمەندىكتەر ءۇشىن ەرتىس وزەنىندە مەدۋزانىڭ پايدا بولعانى توسىن جاڭالىق. ويتكەنى بۇرىن سوڭدى كورمەگەن تەڭىز جاندىگى شىعىسقا قاشان، قالاي كەلگەنى بەلگىسىز. كادىمگىدەي سۋ بەتىندە قاپتاپ جۇرگەن مەدۋزانىڭ قاراسى كۇن وتكەن سايىن كوبەيىپ بارادى.

«تەڭىز جاندىگى جىلى جاققا ىعىستاپ بارا جاتقان بولۋى كەرەك»، - دەيدى بالىقشى يۋري ياكۋشيەۆ. ول العاش رەت مەدۋزانى رەسەيدىڭ ۆلاديۆوستوك قالاسىندا اسكەري بورىشىن وتەپ جۇرگەندە كورىپتى. ون بەس جىل بويى وزەن جاعالاپ جۇرگەن بالىقشى ەرتىس وزەنىنەن مەدۋزانى كورىپ تاڭعالعان.

- مەن باستاپقىدا بالىقتىڭ ۋىلدىرىعى ەكەن دەپ قالدىم. انىقتاپ قاراسام، مەدۋزا. دەنەسىنىڭ ءدال ورتاسىنان تورتكە ءبولىنىپتى، ءپىشىنى بارماقتىڭ جارتىسىنداي عانا. ادەتتە مەدۋزالار تەڭىزدە مەكەن ەتەدى. اركتيكادان باستاپ، تروپيكالىق تەڭىزدەردەن ونىڭ سان الۋان ءتۇرىن كەزدەستىرۋگە بولادى. ءبىراق ولاردىڭ وزەندە قايدان پايدا بولعاندىعى مامانداردى دا ويلاندىرىپ وتىر، - دەيدى بالىقشى.