اتىراۋ وبلىسى موڭعوليا تاجىريبەسىنە نەگىزدەلگەن ءجۇن وڭدەۋ كەشەنىنىڭ قۇرىلىسىن باستادى
اۋىلشارۋاشىلىعى كەشەندى دامىپ كەلە جاتقان وبلىس ءۇشىن بۇل - وتە ءتيىمدى باستاما. سەبەبى كۇنى بۇگىن وڭىردە 670 مىڭ باس ۇساق مال مەن 30 مىڭداي تۇيە وسىرىلۋدە. دەمەك، شيكىزاتتان تارشىلىق بولمايدى.
كەشەن موڭعوليالىق ارىپتەستەردىڭ تاجىريبەسىمەن نەگىزدەلگەن. قاجەتتى تەحنولوگيالار قىتاي مەن يتاليادان اكەلىنەتىن بولادى. الىنعان دايىن ءونىمدى رەسەي مەن ەۋروپا فابريكالارىنا جىبەرۋ جوسپارلانعان. «جوبا 2015 - جىلدىڭ مامىر ايىندا تولىق ىسكە قوسىلادى» ، - دەيدى ماماندار.
ءالىمجان بالجىگىتوۆ، ءجۇن وڭدەۋ كەشەنىنىڭ اتقارۋشى ديرەكتورى:
- بۇل جەردەگى ءجۇندى العاشقى وڭدەۋ كەشەنى 2 سەحتان تۇرادى. ءبىرىنشىسى - ءجۇندى جۋىپ- تازالاۋ، ەكىنشىسى - تازالانعان ءجۇندى تاراپ، ءتۇبىتىن الۋ. ءبىزدىڭ ەسەبىمىزشە ونىڭ ونىمدىلىگى جىلىنا 100 توننا تۇيە ءجۇنىن، 350 توننا قوي ءجۇنىن وڭدەيمىز دەپ وتىرمىز.
