وليمپيادا وتكىزۋ ءۇشىن الماتى كوپ شىعىندالمايدى - توماس باح
حالىقارالىق وليمپيادا كوميتەتىنىڭ پرەزيدەنتى توماس باحتىڭ الماتىعا كەلۋ ساپارىنا وراي بۇگىن ب ا ق وكىلدەرى مەن سپورتشىلارعا ارنالعان باسپا ءسوز جيىنىن ءوتتى.
وعان ح و ك پرەزيدەنتى توماس باح، حوك دەلەگاتسياسىنىڭ وكىلدەرى، ق ر ۇلتتىق وليمپيادا كوميتەتىنىڭ پرەزيدەنتى تەمىرحان دوسمۇحامبەتوۆ، ق ر مادەنيەت جانە سپورت ءمينيسترى ارىستانبەك مۇحامەدي ۇلى، ق ر مادەنيەت جانە سپورت مينيسترلىگىنىڭ ۆيتسە- ءمينيسترى تاستانبەك ەسەنتايەۆ جانە باسقا دا لاۋازىمدى تۇلعالار قاتىستى.
باسقوسۋ بارىسىندا ح و ك پرەزيدەنتىنە «نەگە كەيىنگى جىلدارى قىسقى وليمپيادا ويىندارىن وتكىزۋگە نيەت بىلدىرۋشىلەر سانى ازايىپ كەتتى، شىعىنى شاش- ەتەكتەن بە؟ » دەگەن سۇراق قويىلدى. سوندا حوك پرەزيدەنتى توماس باح:
- نەگىزى، ءاۋ باستان قىسقى وليمپيادا ويىندارىن وتكىزۋگە نيەت بىلدىرۋشىلەر سانى جازعى وليمپيادانى وتكىزگىسى كەلەتىندەردەن الدەقايدا از بولاتىن. ونىڭ باستى سەبەبى - جاعرافيالىق ەرەكشەلىكتە. جاعرافيالىق جاعدايى مەن تابيعات ەرەكشەلىكتەرىنە بايلانىستى بارلىق قۇرلىق قىسقى وليمپيادا ويىندارىن وتكىزە المايدى. قىسقى وليمپيادا ويىندارىن وتكىزۋگە بولاتىن قۇرلىقتار مەن ەلدەر سانى كوپ ەمەس.
ال شىعىن جاعىنا كەلەر بولساق، سوڭعى ەكى قىسقى وليمپيادا ويىندارىن وتكىزگەن ۆانكۋۆەر مەن سوچي تۇپتەپ كەلگەندە پايدا كوردى. بۇل جەردە سوچيدىڭ جاعدايى تىم بولەك. ويتكەنى بۇل جازعى شيپايجايلى (كۋرورتتى) قالا عانا بولاتىن. ياعني قىسقى وليمپيادا ويىندارىن وتكىزۋگە بولاتىن ەشتەڭە جوق ەدى. سپورتتىق كەشەندەردى ايتپاعاننىڭ وزىندە، تەلەكوممۋنيكاتسيالىق قۇرىلىمى، ينفراقۇرىلىمدىق جۇيەسى - ءبارى- ءبارى جاڭادان جاسالدى. قانشاما سپورتتىق كەشەندەر، قوناق ۇيلەر تاعى دا باسقا ينفراقۇرىلىمدىق جۇيەلەر سالىندى. سوندىقتان سوچيدىڭ شىعىنى كوپ بولدى.
ال الماتىنى سوچيمەن سالىستىرۋعا مۇلدە بولمايدى. الماتى - سپورتتىق شەجىرەسى بار، تەلەكوممۋنيكاتسيالىق جانە ينفراقۇرىلىمدىق جۇيەسى دامىعان قالا. سپورتتىق كەشەندەردىڭ كوبىسى بار. 2017 - جىلعى قىسقى ۋنيۆەرسياداعا دەيىن ءبارى دە دايىن بولماق، - دەپ جاۋاپ بەردى.
ق ر ۇلتتىق وليمپيادا كوميتەتىنىڭ پرەزيدەنتى تەمىرحان دوسمۇحامبەتوۆ:
- جالپى، قىسقى وليمپيادا ويىندارىن وتكىزۋ ءۇشىن باستى ءۇش تالاپ قاتاڭ ساقتالادى. ءبىرىنشىسى - ەلدەگى ساياسي احۋال، ساياسي تۇراقتىلىق. ەكىنشىسى - ەكونوميكالىق جاعداي. ءۇشىنشىسى - حالىقارالىق دەڭگەيدەگى سپورتشىلارىنىڭ بولۋى. بىزدە بۇل ۇشەۋى دە بار. ءارى ءبىز سوچي سياقتى كوپ شىعىندالمايمىز. سوچيدە ەشتەڭە جوق بولاتىن. سوندىقتان قالا تولىقتاي قايتا وڭدەلدى. ال بىزدە كوبىسى بار.
كەشەدەن بەرى ونى ح و ك وكىلدەرى ءوز كوزدەرىمەن كوردى. "مەدەۋدە"، "شىمبۇلاقتا"، "سۇڭقاردا" بولىپ، قايران قالىستى. ءبارى دە حالىقارالىق تالاپقا ساي. بىزدە پرەزيدەنتتىڭ ءوزى سپورتتى دامىتۋعا ايرىقشا كوڭىل ءبولىپ وتىرادى. بارلىق ايماقتارىمىزدا سپورتتىق كەشەندەر سالىنىپ جاتىر. ح و ك دەلەگاتسياسى اسىعىس ەكەن، قازىر ەكى ساعاتتان كەيىن كەرى ۇشادى. ايتپەسە، باسقا دا سپورتتىق كەشەندەرىمىزدى كورسەتەر ەدىك. تاعى دا كەلىڭىزدەر دەپ وتىرمىز. باسقا وڭىرلەرىمىزدى دە كورسەتە الامىز، - دەپ ءوز ويىن قوستى.
اۆتور: نۇرعازى ساسايەۆ
