15:56, 11 - قازان 2014 | GMT +5
ىزدەۋدە جۇرگەن قازاقستان ازاماتتارى ءازىربايجاندا ۇستالدى
استانا. قازاقپارات - بۇگىن قازاقستاندىق ازاماتتار فارحات ابدۋراحمانوۆ پەن شاۆكيات زۋبانوۆ ءازىربايجان رەسپۋبليكاسىنان ەلگە جەتكىزىلدى، دەپ حابارلادى قازاقستان رەسپۋبليكاسى باس پروكۋراتۋراسىنىڭ باسپا ءسوز قىزمەتىنەن.
تەرگەۋ ورگاندارى ابدۋراحمانوۆتى زاڭسىز جولمەن ەسىرتكىلىك زاتتار الىپ، ولاردى ساتۋ ماقساتىندا ساقتاپ، تاسىمالداعاندىعى ءۇشىن ايىپتاپ وتىر.
زۋبانوۆ قاراقشىلىق شابۋىل جاساپ، «لەكسۋس LX 470» ماركالى اۆتوكولىگىن ۇرلاعاندىعى ءۇشىن ايىپتى بولدى.
حالىقارالىق ىزدەۋ جاريالانعان بۇل ادامداردى ءازىربايجاننىڭ قۇقىق قورعاۋ ورگاندارى قولعا تۇسىرگەن.
وسى ورايدا قازاقستان رەسپۋبليكاسى باس پروكۋراتۋراسىنىڭ ءازىربايجاندىق ارىپتەستەرىنە قولعا تۇسكەندەردى ەلگە قايتاۋ تۋرالى جىبەرگەن وتىنىشتەرى قاناعاتتاندىرىلدى.
ەكستراديتسيالانعان ادامدار الماتى قالاسىنىڭ اۋەجايىندا تەرگەۋ اباقتىسىنىڭ قىزمەتكەرلەرىنىڭ قولىنا تاپسىرىلدى.
