استانادا قوستاناي جانە شىعىس قازاقستان وبلىستارىنىڭ جارمەڭكەسى ءوتىپ جاتىر - فوتو
قوستاناي وبلىسىنىڭ اۋىل شارۋاشىلىعى ونىمدەرىن وندىرۋشىلەرىنىڭ جارمەڭكەسى تىڭ يگەرۋدىڭ 60 جىلدىعانا ارنالدى. وبلىس اتىنان جارمەڭكەگە ءوڭىردىڭ 20 اۋدانى مەن قالالارىنان 60 تان استام اۋىل شارۋاشىلىق كاسىپورىندارى قاتىسۋدا. سونىڭ ىشىندە قازاقستاندا بەلگىلى «دەپ»، «جاڭا كۇن»، «وسوبا»، «كورونا»، «تەررا» جانە ت. ب. فيرمالار دا بار. جالپى، اتالعان وڭىردەن 550 توننانى قۇرايتىن 60 شاقتى ءونىم ءتۇرى ساتىلىمعا شىعارىلدى. سونىمەن قاتار، استانا تۇرعىندارى مەن قوناقتارى ءۇشىن باۋىرساق فەستيۆالى وتكىزىلىپ، اۋىل شارۋاشىلىعى ونىمدەرىنىڭ كورمەسى ۇيىمداستىرىلدى.
ال شىعىس قازاقستان وبلىسىنان 450 توننادان استام اۋىل شارۋاشىلىق ءونىمى اكەلىنگەن. جارمەڭكەگە كەلۋشىلەر بال جانە ومارتاشىلىق ونىمدەرىنە ۇلكەن قىزىعۋشىلىق تانىتىپ وتىر.
«قىركۇيەك ايىنىڭ سوڭىنان قاراشا ايىنىڭ باسىنا دەيىن اۋىل شارۋاشىلىق جارمەڭكەلەرىن وتكىزۋ يگى داستۇرگە اينالدى. بۇگىن ەلىمىزدىڭ ەكى ءىرى ءوڭىرى - شىعىس قازاقستان جانە قوستاناي وبلىستارى كەلىپ وتىر. جارمەڭكەگە 100 گە جۋىق اۋىل شارۋاشىلىق ونىمدەرىن وندىرۋشىلەرى قاتىسۋدا. ولار مىڭ توننادان استام ءونىمدى استانا بازارلارىنا قاراعاندا %15-20 ارزان باعامەن ۇسىنۋدا. بۇعان دەيىن بىرنەشە جارمەڭكە وتكىزىلدى، وعان 100 مىڭعا جۋىق ادام كەلگەن»، - دەدى استانا قالاسىنىڭ اكىمى يمانعالي تاسماعامبەتوۆ.
ونىڭ ايتۋىنشا، جارمەڭكە وڭىرلەردىڭ قارقىندى دامۋىنىڭ بەلگىسى عانا ەمەس، سونىمەن قاتار اۋىل شارۋاشىلىق ونىمدەرىن وندىرۋشىلەر ءۇشىن باسقا ءوڭىردىڭ كاسىپكەرلەرىمەن كەلىسىمدەرگە وتىرىپ، جاڭا وتكىزۋ نارىعىن يگەرۋ مۇمكىندىگىن اشادى.
جارمەڭكە بارىسىندا قوستاناي جانە شىعىس قازاقستان وبلىستارىنىڭ شىعارماشىلىق ۇجىمدارى كونسەرتتىك باعدارلامالارىن ۇسىندى.
