قاراعاندىنىڭ بۇرىنعى اكىمى قاماۋدان بوساتىلمايتىن بولدى
قاراعاندىنىڭ بۇرىنعى اكىمى تەرگەۋ جۇمىستارى اياقتالعانشا 2 اي بويى، ياعني 1- جەلتوقسانعا دەيىن تەرگەۋ يزولياتورىندا وتىراتىن بولدى.
قاراعاندى وبلىستىق سوتىنىڭ سۋدياسى قارلىعاش نۇرماعامبەتوۆا سوت قاۋلىسىن جاريا ەتۋ كەزىندە ءوزىنىڭ بۇل شەشىمىن بىلايشا ءتۇسىندىردى. ەگەر سماعۇلوۆ تەرگەۋ كەزىندە بوستاندىققا شىقسا، ونىڭ تەرگەۋ ورگاندارىنان قاشۋى جانە ءىستىڭ وبەكتيۆتى تەرگەلۋىنە كەدەرگى كەلتىرۋى مۇمكىن ەكەنىن ايتتى.
«سوت ءوزىنىڭ قاۋلىسىن وزگەرىسسىز قالدىرۋدىڭ ءجون ەكەنىن العا تارتتى. ويتكەنى قاراعاندىنىڭ ەكس-اكىمى ەكى بىردەي ەپيزود بويىنشا اۋىر قىلمىس جاسادى دەپ ايىپتالىپ وتىر. سماعۇلوۆ ق ر ق ك-نىڭ 4- ءبولىمى، 307-بابى بويىنشا ايىپتالۋدا. «ءوزىنىڭ قىزمەتىن اسىرا پايدالانىپ، ياعني مەملەكەتتىك جاۋاپتى قىزمەتتە وتىرعان شەنەۋنىك وزىنە سەنىپ تاپسىرىلعان قىزمەتكە نۇقسان كەلتىردى، ءوز پايداسى ءۇشىن مەملەكەتتىك بيلىككە زيانىن تيگىزدى» - دەدى قارلىعاش نۇرماعامبەتوۆا ءوزىنىڭ قاۋلىسىندا.
الايدا ايىپتالۋىشىنىڭ ادۆوكاتتارى سوتتان سماعۇلوۆتى ەشقايدا كەتپەۋ تۋرالى قولقات ارقىلى بوساتۋىن سۇرادى. «سماعۇلوۆ الدىن الا تەرگەۋ كەزىندە ەشقايدا جاسىرىنىپ قاشقان جوق، جاسىرىنۋعا ارەكەت تە جاساعان ەمەس. ول تەرگەۋ ورگاندارىنا ءبىرىنشى شاقىرۋدان-اق كەلدى. سماعۇلوۆتىڭ وتباسى، ەكى بالاسى بار. سونداي-اق ايىپتالۋشىنىڭ دەنساۋلىعى دا ناشار، ونى دالەلدەيتىن مەديتسينالىق انىقتامالارى دا بار» - دەدى قورعاۋشىلار. الايدا سوت ولاردىڭ سۇراۋىن قاناعاتتاندىرمادى.
ەستەرىڭىزگە سالا كەتەيىك، قىلمىستىق ءىس ماتەريالىندا كورسەتىلگەنىندەي قاراعاندىنىڭ ەكس-اكىمى مەيرام سماعۇلوۆ 2013-جىلى قاراعاندى قالاسىندا «قولجەتىمدى باسپانا» مەملەكەتتىك باعدارلاماسى بويىنشا ۇيلەردى سالۋمەن اينالىساتىن «يۋتەكس» قۇرىلىس كومپانياسىنىڭ قۇرىلىسشىلارىنا ءوز ءۇيىن تەگىن جوندەتكەن. كومپانيا ەكس-اكىمنىڭ ءۇيىن جوندەۋگە 5 ميلليون تەڭگە جۇمساپتى. بۇرىنعى اكىم 2- قازان كۇنى ۇستالدى.
