قىتاي بالۋانى جاعىن سىندىرسا دا، قولا جۇلدەنى تارتىپ العان قازاق

الماتى. قازاقپارات - جاعى سىنسا دا قولا جۇلدەنى يەمدەنگەن المات كەبىسپايەۆقا الماتىدا وتا جاسالدى. بۇل تۋرالى قازاقستان سپورتتىق جەكپە- جەك جانە كۇش قولدانىلاتىن سپورت تۇرلەرى كونفەدەراتسياسىنىڭ باسپا ءسوز حاتشىسى جىگەر ازبەرگەنوۆ ايتتى.

ونىڭ ايتۋىنشا، سپورتشىنىڭ دەنساۋلىعى جاقسى، ول ەرتەڭ اۋرۋحانادان شىعايىن دەپ جاتىر.

ەستەرىڭىزگە سالا كەتەيىك، المات كەبىسپايەۆ ينچحونداعى ازيادا ويىندارىندا قىتايلىق بالۋانمەن بەلدەسۋ كەزىندە وتە اۋىر جاراقات العان بولاتىن. جاعى سىنىپ، ميى شايقالعانىنا قاراماستان ول جەكپە-جەكتى جالعاستىرۋىن ءوتىنىپ، قازاقستان قانجىعاسىنا قولا مەدالدى بايلادى.

«المات ينچحونداعى ازيادا ويىندارىندا ەرەكشە جىگەر كورسەتتى. العان جاراقاتىنا قاراماستان قارسىلاسىنىڭ جاۋىرىنىن جەر يىسكەتتى. باپكەرلەر شتابى ونى شيرەك فينالعا شىعارعىسى كەلمەپ ەدى. الايدا، سپورتشى ءوز دەگەنىندە تۇردى»، - دەدى گرەك-ريم بويىنشا قازاقستان ۇلتتىق قۇراماسىنىڭ باس باپكەرى تاڭات ساعىندىقوۆ.

بيىلعى ازيادا ويىندارىندا كونفەدەراتسيا تاراپىنان 73 سپورتشى قازاقستان نامىسىن قورعادى. ولار 32 مەدال، ونىڭ ىشىندە 9 التىن، 12 كۇمىس، 11 قولا مەدال يەلەندى. بۇل بارلىق جۇلدە قورىنىڭ 38 پايىزىن قۇرايدى. ال، بوكس بويىنشا قازاقستان قۇراماسى ەڭ ۇزدىك ناتيجە (6 التىن، 2 كۇمىس، 2 قولا) كورسەتكەنى بەلگىلى.

اۆتور: گۇلميرا ءعوسمانالي