قىتايدا سەكتا مۇشەلەرى ءولىم جازاسىنا كەسىلدى

استانا. قازاقپارات - قىتايدا سوت تىيىم سالىنعان سەكتانىڭ ەكى مۇشەسى ءولىم جازاسىنا كەسىلدى. ولار شاندۋڭ شىعىس پروۆينتسياسىنداعى «ماكدونالدس» مەيرامحاناسىندا ايەل ادامدى ءولتىردى دەپ ايىپتالىپ وتىر، دەپ حابارلادى بي-بي-سي.

تەرگەۋ امالدارىنىڭ قورىتىندىسى بويىنشا، وقيعا قۇربانى 37 جاستاعى ۋ. شويان مامىر ايىندا سەكتانتتارعا ءوز تەلەفون ءنومىرىن بەرۋدەن باس تارتقانى ءۇشىن ولتىرىلگەن. ونىڭ ولىمىنە سەبەپ بولعاندار مەيرامحانا ۆيدەوكامەرالارىنا ءتۇسىپ قالعان جانە ونى وقيعا كۋاگەرلەرى ۇيالى تەلەفوندارىنا ءتۇسىرىپ العان.

سەكتانىڭ تاعى ءبىر مۇشەسى سوققى جاساۋعا قاتىسقانى ءۇشىن تۇرمەگە قامالادى.

ايتا كەتەيىك، «قۇدىرەتتى قۇدايدىڭ شىركەۋى» دەگەن اتپەن تانىس ءدىني توپقا قىتايدا تىيىم سالىنعان. ونىڭ وكىلدەرى سەكتاداعى ادامدار سانى ميليوننان اساتىنىن ايتىپ وتىر. ايىپتالۋشىلاردىڭ ءبىرى دجان ليدۋن قاماۋعا الىنعاننان كەيىن جۋرناليستەرگە سۇحبات بەردى. وندا ول ءوزىنىڭ جاساعان ىسىنە ەش وكىنبەيتىنىن جەتكىزدى.

«مەن ونى بار كۇشىممەن ۇردىم. سونداي- اق، اياعىممەن تەپتىم. ول - ءازازىل، سايتان. ءبىز ونىڭ كوزىن جويۋىمىز كەرەك بولدى»، - دەدى ول.

 «قۇدىرەتتى قۇدايدىڭ شىركەۋى» دوكتريناسى بويىنشا، ولار قىتاي قىزى بەينەسىندە جەرگە تۇسكەن «قۇدايعا» سەنەدى. ونىڭ سوزىنە قاراعاندا، ادام كەيپىندەگى قۇدايمەن بۇرىنعى فيزيكا مۇعالىمى، 25 جىل بۇرىن وسى اعىمنىڭ نەگىزىن قالاعان چجاو ۆەيشان عانا كەزدەسكەن. ءبىراق، ول ا ق ش- تا تۇرادى.