07:57, 10 - قازان 2014 | GMT +5
تۇركيادا شابۋىل سالدارىنان ءۇش پوليتسەي قازا تاپتى
استانا. قازاقپارات - بەلگىسىز بىرەۋلەر تۇركيانىڭ بينگەل پروۆينتسياسى پوليتسياسىنىڭ باسشىسىنا شابۋىل جاساپ، جاراقاتتادى. ونىڭ جانىنداعى ءۇش وفيتسەر قازا تاپتى، دەپ حابارلادى ر ي ا نوۆوستي.
وقيعا ەل شىعىسىنداعى پروۆينتسيانىڭ اكىمشىلىك ورتالىعىندا بولعان. جەرگىلىكتى پوليتسيا باسشىسى اتالاي ۋركەر «يسلام مەملەكەتى» لاڭكەستىك توبىنا قارسى بۇقارالىق شارالاردان كەيىن جاپا شەككەن كاسىپورىنداردى باقىلاپ جۇرگەن. بەلگىسىز بىرەۋلەر ۋركەر مەن ونىڭ جانىنداعى ءۇش كومەكشىسىنە وق جاۋدىرعان.
تۇركيادا بۇقارالىق تارتىپسىزدىكتەر جالعاسۋدا. ونى كۇرد تۇرعىندارى تۇرىك ۇكىمەتىنىڭ سيرياداعى جاعدايعا ارالاسپاۋ تۋرالى ساياساتىنا قارسىلىق رەتىندە ۇيىمداستىرىپ وتىر. تۇركيانىڭ التى پروۆينتسياسىندا، سونىمەن بىرگە ستامبۇلدىڭ ءبىرقاتار اۋداندارىندا كومەندانتتىق ساعات جاريالاندى. تارتىپسىزدىك سالدارىنان 20 دان استام ادام زارداپ شەكتى.
