اتىراۋ وبلىسىنداعى دامبا اۋىلىندا تۇسىنىكسىز جايتتار ورىن الىپ ءجۇر

استانا. قازاقپارات - اتىراۋ وبلىسىندا اۋىل اكىمى جىن-شايتانمەن كۇرەس جۇرگىزۋدە.

اتىراۋ وبلىسىنداعى دامبا اۋىلىندا تۇسىنىكسىز جايتتار ورىن الىپ ءجۇر.

جەرگىلىكتى تۇرعىنداردىڭ ايتۋىنشا، سوڭعى ون كۇندە ەكى ايەل وزىنە قول سالىپ قايتىس بولسا، تاعى ەكەۋى جىندانىپ كەتكەن.

بۇل جايىندا "اق جايىق" باسىلىمىنىڭ سايتىندا حابارلانعان دەپ جازادى Baq.kz.

اۋىل ازاماتتارى ولاردىڭ ىشىنە جىن كىرىپ كەتكەن دەپ ەسەپتەيدى. سالدارىنان حالىق ۇرەيلەنىپ، كەشكە مۇمكىندىگىنشە دالاعا شىقپاۋعا تىرىسادى ەكەن.

دامبا اۋىلدىق وكرۋگىنىڭ اكىمى ۇزاقباي بايزۋليننىڭ ايتۋىنشا، جىل باسىنان بەرى مۇندا 4 ەرەسەك ازامات وزىنە قول سالعان كورىنەدى. ال، قازىر ەكى ايەل پسيحيكالىق اۋرۋعا شالدىققان.

"ورىن العان وسىناۋ كەلەڭسىز جايتتى بولدىرماۋ ءۇشىن ءبىز اۋىلعا ورتالىق مەشىتتەن يمامدار شاقىردىق. وبلىستىڭ باس يمامىمەن بىرگە بىرنەشە ءدىن وكىلى كەلدى. جاعدايدى ءتۇسىندىرىپ بەردى. ەندى بۇكىل اۋىل بولىپ ساداقا بەرمەكپىز"، - دەيدى اكىم.

وبلىستىڭ باس يمامى باۋىرجان مانسۇروۆ تا دامبا اۋىلىندا جىن بولۋى مۇمكىن دەگەن فاكتىنى جوققا شىعارمايدى.

"دىندە - قۇران مەن حاديستە جىننىڭ بار ەكەندىگى ايتىلادى. ەگەر پەرىشتەلەر ادامعا جاقسىلىق الىپ كەلسە، جىن-شايتاندار ولارعا قارسى جۇمىس ىستەيدى. ءبىز دامبا اۋىلىندا تۇسىنىكسىز جايتتاردىڭ ورىن الىپ جاتقانىن ەستىپ، يمامدارمەن بىرگە بارىپ كەلدىك.

جەرگىلىكتى تۇرعىنداردى جيناپ، جاعدايدى ءتۇسىندىرىپ ايتتىق. ادەتتە، جىن-شايتان لاس جەرگە كەلەدى. سوندىقتان، ادامداردىڭ بارلىعى ءۇيى مەن كوشەنى، اۋلانى تازا ۇستاۋى ءتيىس"، - دەيدى باس يمام. 

NUR. KZ